नंदुरबारात अडीच लाखांच्या सात मोटरसायकली जप्त

तरुण भारत लाईव्ह न्यूज । ८ डिसेंबर २०२२ । नंदुरबार शहर व परिसरातून चोरीस गेलेल्या मोटारसायकलींचा तपास करताना तब्बल २ लाख ६५ हजार रुपये किंमतीच्या ७ दुचाकी स्थानिक गुन्हे शाखेच्या पथकास गवसल्या आहेत. या प्रकरणी दोन आरोपींना ताब्यात घेण्यात आले असून त्यांच्याविरुद्ध शहर पोलिसांत गुन्हा दाखल करण्यात आला.

निलेश हसीराम कोकणी (वय २२ रा. झामट्यावड ता.नवापूर) व राकेश दिलवर कोकणी (वय २१ रा.बिजादेवी ता.नवापूर) असे अटकेतील आरोपींचे नावे आहेत.

पोलिसांनी दिलेल्या माहितीनुसार, पोलीस अधीक्षक पी.आर.पाटील यांना दि. ३ डिसेंबर रोजी नंदुरबार शहरात नवापूर चौफुली परीसरात दोन इसम कागदपत्र नसलेले मोटरसायकल कमी किंमतीत विकत असल्याची माहिती मिळाली. त्यांनी पोलीस निरीक्षक किरणकुमार खेडकर यांना चौकशीचे आदेश दिले. श्री.खेडकर यांनी तात्काळ स्थानिक गुन्हे शाखेचे १ पथक रवाना केले असता नवापूर चौफुली परीसरात दोन्ही संशयीत मिळून आल्याने त्यांना ताब्यात घेण्यात आले. त्यांनी सदरची मोटार सायकल सुमारे २० ते २५ दिवसापूर्वी शहरातील जिल्हा रुग्णालय परिसर येथून रात्रीच्यावेळी चोरी केल्याचे सांगितले. नंदुरबार शहर पोलीस ठाण्यात भा.दं.वि. कलम ३७९ प्रमाणे गुन्हा दाखल आहे.