जळगाव : जिल्ह्यात गत सप्ताहात बेमोसमी पावसाने थैमान घातले होते. यात सुमारे सहा हजाराहून अधिक हेक्टरवरील शेतपिकांना फटका बसला होता. याचे पंचनामे होत नाहीत तोच या सप्ताहात शनिवारपासून पुन्हा ढगाळ वातावरण झाले आहे. शनिवारी दुपारनंतर ढगाळ वातावरणासह तापमान कमाल ३९ तर २७ अंशांची नोंद झाली असून, आगामी १३ मेपर्यंत पुन्हा बेमोसमी पावसाचे संकेत असल्याचे हवामान विभागाने अंदाज वर्तविला आहे.
जिल्ह्यात मे महिन्याच्या सुरूवातीलाच तप्त उन्हाचा तडाखा असतानाच गत सप्ताहात बेमोसमी पावसाने हजेरी लावली आहे. यात रब्बी हंगामातील केळी बागायती पिकांसह ज्वारी, बाजरी, मका आदी शेतपिकांचे मोठ्या प्रमाणावर नुकसान झाले आहे. या नुकसानीची पाहणी पालकमंत्री गुलाबराव पाटील, वस्त्रोद्योग मंत्री संजय सावकारे, केंद्रीय राज्यमंत्री रक्षा खडसे, खासदार स्मिता वाघ, तसेच जिल्हाधिकारी आयुष प्रसाद, जिल्हा कृषी अधीक्षक कुरबान तडवी आदी अधिकाऱ्यांनी पाहणी करीत पंचनामे करण्यात आले आहेत.
ही परिस्थिती निवळत नाही तोच…
ही परिस्थिती निवळत नाही तोच शनिवार दुपारपासूनच जिल्ह्यात ढगाळ वातावरण अनुभवास आले. जिल्ह्यात ११ ते १३ मे दरम्यान तापमान ३७ ते ३९ अंशादरम्यान राहणार असून, ढगाळ वातावरणासह तुरळक ते मध्यम २ स्वरूपात पावसाचा अंदाज आहे.
तसेच १४ ते १९ मे दरम्यान आकाश निरभ्र राहणार असून तापमान ४० ते २६ अंशादरम्यान राहण्याचा अंदाज आहे. त्यानंतर पुन्हा २० आणि २१ मे दरम्यान ढगाळ वातावरणासह बेमोसमी पावसाचा अंदाज हवामान विभागाकडून वर्तविण्यात आला आहे.
