नवी दिल्ली : हिंडेनबर्ग संशोधनाबाबत भारतात पुन्हा एकदा वाद निर्माण झाला आहे. हिंडेनबर्गने पुन्हा एकदा अदानी समूहाला लक्ष्य करण्याचा प्रयत्न केला आहे मात्र अदानी समूहाने अमेरिकन संशोधन कंपनीचे सर्व दावे पूर्णपणे फेटाळून लावले आहेत. दरम्यान, आता केंद्रीय मंत्री गिरीराज सिंह यांनी हिंडेनबर्ग रिसर्चवर कारवाईचा इशारा दिला आहे. त्यांनी हिंडेनबर्गवर काँग्रेसशी हातमिळवणी केल्याचा आरोपही केला. गिरीराज सिंह यांनी आणखी काय म्हटले ते जाणून घेऊया.
केंद्रीय वस्त्रोद्योग मंत्री गिरीराज सिंह यांनी काँग्रेस नेते राहुल गांधी आणि जयराम रमेश यांच्यावर निशाणा साधला आहे. राहुल गांधी आणि जयराम रमेश ही देशाची बदनामी करणारी टोळी असल्याचं त्यांनी म्हटलं आहे. हिंडेनबर्ग आमची बदनामी करतो. देशाचा हा अपमान आम्ही सहन करणार नाही. हे लोक देशाचे शत्रू आहेत. आता हिंडेनबर्गवर कडक कारवाई केली जाईल.
गिरीराज सिंह म्हणाले की, राहुल गांधी यांना देश आणि त्याची दिशा याबाबत काहीच माहिती नाही. ते म्हणाले की, देशवासीयांनी गोंधळ आणि भीती निर्माण करणाऱ्या लोकांपासून सावध राहिले पाहिजे. हिंडेनबर्ग प्रकरणाची संयुक्त संसदीय समिती (जेपीसी) चौकशी करण्याच्या काँग्रेसच्या मागणीबद्दल विचारले असता, गिरीराज म्हणाले की काँग्रेस हिंडनबर्गच्या मागे आहे. हिंडेनबर्ग हे भारताला नष्ट करण्याचे टूल किट असून राहुल गांधींसारखे लोक त्यात गुंतले आहेत, असे गिरीराज यांनी म्हटले आहे.
राहुल गांधी परदेशात गेले तरी देशाची बदनामी करतात, असे केंद्रीय मंत्री गिरीराज सिंह यांनी म्हटले आहे. ते घरी असताना देशवासीयांमध्ये गोंधळ आणि भीती निर्माण करतात. अशा लोकांपासून देशवासीयांनी सावध राहावे. संभ्रम निर्माण करणे हे देशद्रोहींचे काम असू शकते. हे न्याय्य नाही, कोणताही देशभक्त असे कृत्य करू शकत नाही.
सेबी आणि अदानी समूह या दोघांनीही हिंडेनबर्गचे आरोप कठोरपणे नाकारले आहेत आणि ते पूर्णपणे निराधार असल्याचे म्हटले आहे. हिंडेनबर्गचे आरोप दुर्भावनापूर्ण आणि निवडकपणे सार्वजनिक माहितीचा विपर्यास करणारे असल्याचे अदानी समूहाने म्हटले आहे.
