Terrible Accident : पालघर: भरधाव वेगातील डंपरची एसटी बसला धडक बसल्याने भीषण अपघात बोरांडा फाटा नजीक घडला आहे. या अपघातात एका चिमुकल्याचा मृत्यू झाला असून १९ प्रवासी जखमी झाले आहेत. जखमींना उपचारासाठी रुग्णालयात दाखल करण्यात आले असून त्यांच्यावर उपचार सुरू आहेत. पालघर- मनोर- विक्रमगड मार्गावर विक्रमगड येथून पालघरच्या दिशेने येणाऱ्या शिर्डी प्रवासी एसटी बसला विक्रमगडच्या दिशेने जाणाऱ्या एका डंपरने जोरदार धडक दिली.
बोरांडा फाटा येथील तलाठी कार्यालयानजीक हा भीषण अपघात घडला. हा अपघात इतका भीषण होता की डंपरने दिलेल्या या जोरदार धडकेत एसटी बस काही अंतर मागे ढकलली गेली. एसटी बस रस्त्यालगत असलेल्या खजुराच्या झाडाला अडकली. अन्यथा बस रस्त्यालगतच्या शेतात उलटून अधिक भीषण दुर्घटना घडली असती, असे प्रत्यक्षदर्शींनी सांगितले. एसटी बसच्या पुढच्या भागाचा चक्काचूर झाला आहे. अपघाताची माहिती मिळताच स्थानिकांनी घटनास्थळी धाव घेतली. बचाव कार्य सुरू केले. हा अपघात घडला त्याचवेळी विक्रमगड दौऱ्यावर असलेले पालघरचे खासदार राजेंद्र गावित यांचा ताफा अपघातस्थळी पोहोचला.
खासदारांनी आपला ताफा थांबवून मदत कार्य करण्यात स्वतः पुढाकार घेतला. जखमींना उपचारासाठी रुग्णालयात दाखल करण्यासाठी रुग्णालयात पाठवण्याची व्यवस्था उपलब्ध केली. दरम्यान पोलीस कर्मचारी देखील घटनास्थळी दाखल झाल्यानंतर त्यांनाही बचाव कार्य करण्यासंदर्भात सूचना खासदारांनी दिल्या. डंपर आणि एसटीच्या झालेल्या या भीषण अपघातात एका दीड वर्षाच्या चिमुकल्याचा मृत्यू झाला असून १९ प्रवासी जखमी झाले आहेत. यातील सात प्रवासी गंभीररीत्या जखमी झाल्याने त्यांना धुंदलवाडी येथील वेदांता रुग्णालयात उपचारासाठी दाखल करण्यात आले आहे. त्याचप्रमाणे दहा प्रवाशांना मनोर येथील खाजगी रुग्णालयात आणि दोन प्रवाशांना मनोर येथील शासकीय रुग्णालयात दाखल करण्यात आले असून त्यांच्यावर उपचार सुरू आहेत.
