तरुण भारत लाईव्ह न्यूज । २२ डिसेंबर २०२२ । बिबट्याने शेतकऱ्याच्या एका गोऱ्हाचा फडसा पाडल्याची घटना समोर आली आहे. ही पाचोरा तालुक्यातील कुऱ्हाड बु” उमरदे शिवारात मध्यरात्रीच्या सुमारास घडली. विशेष म्हणजे, गेल्या चार दिवसांपासून एका शेतकऱ्याला ट्रॅक्टरमधून मजूर कापूस वेचणीसाठी नेत असताना धरणाजवळ बिबट्या आढळून आला होता. सद्या कापूस वेचणीचे सिझन असल्याने मजूर वर्गात भितीचे वातावरण निर्माण झाल्याने मजूर शेतात येण्यास धझावत नसल्याने शेतकरी वर्गात चिंतेचे वातावरण निर्माण झाले आहे. या घटनेत शेतकऱ्याचे सुमारे १५ हजार रुपयाचे नुकसान झाले असून वन विभागाच्या कर्मचाऱ्यांनी घटनास्थळी जाऊन पंचनामा केला आहे.
पाचोरा तालुक्यातील नाईकनगर येथील भिमराव बन्छी चव्हाण या शेतकऱ्यांने उमरदे – कुऱ्हाड बु” शिवारातील शेतात एक गाय व दोन गोऱ्हे बांधून घरी आल्यानंतर त्यांना सकाळी सहा वाजता शेजारी असलेल्या भालचंद्र चौधरी यांचा भ्रमणध्वनी आला व त्यांनी गोऱ्हा आरडाओरडा ओरड करीत असल्याची माहिती दिली. भिमराव बन्छी चव्हाण यांनी शेतात जावून पाहणी केली असता गोऱ्हा मयत अवस्थेत आढळून आला. घटनास्थळी वनविभागाच्या कर्मचाऱ्यांनी पंचनामा केला. परीसरात भीतीचे वातावरण निर्माण झाल्याने नागरीकांनी बिबट्याचा बंदोबस्त करण्याची मागणी केली.
