प्रवाशांना दिलासा ! उन्हाळी विशेष गाड्यांच्या अतिरिक्त ४९८ फेऱ्या होणार, ‘या’ गाड्यांमुळे दिलासा

उन्हाळी हंगामात प्रवाशांची वाढती उन्हाळी विशेष गाड्या चालवण्याचा निर्णय घेतला आहे. भारतीय रेल्वेने एकूण ८५४ विशेष गाड्या चालविण्याचा निर्णय घेतला आहे, यात २७८ अनारक्षित रेल्वे गाड्यांचाही समावेश आहे. यामुळे प्रवाशांना जनरल तिकीट काढून या गाड्यानी प्रवास करता येणार आहे. यामुळे प्रवाशांना प्रवास करण्यासाठी दिलासा मिळणार आहे. या गाड्या भुसावळ विभागातून धावणार आहेत.

या गाड्यांमुळे दिलासा

लोकमान्य टिळक टर्मिनस येथून दानापूर, मऊ आणि बनारससाठी विशेष गाड्या चालवण्यात येणार आहेत. लोकमान्य टिळक टर्मिनस-दानापूर द्वि-साप्ताहिक विशेष गाडी ७ एप्रिल ते ३० जून या कालावधीत दर सोमवार आणि शनिवारी दुपारी १२.१५ वाजता सुटेल तर परतीची गाडी दानापूर येथून ८ एप्रिल ते १ जुलै या या कालावधीत दर मंगळवार आणि रविवारी रात्री ७ वाजता सुटेल.

लोकमान्य टिळक टर्मिनस-मऊ द्वि-साप्ताहिक विशेष गाडी ६ एप्रिल ते २९ जून या कालावधीत दर शुक्रवारी आणि रविवारी दुपारी १ २ .१ ५ वाजता सुटेल.मऊ येथून ८ एप्रिल ते १ जुलै या कालावधीत दर रविवारी आणि मंगळवारी पहाटे ५.५० वाजता परतीचा प्रवास सुरू होईल. लोकमान्य टिळक टर्मिनस-बनारस द्वि-साप्ताहिक विशेष गाडी ९ एप्रिल ते २६ जून या कालावधीत दर बुधवार आणि गुरुवारी दुपारी १२.१५ वाजता सुटेल.

बनारस येथून १० एप्रिल ते २७ जून या कालावधीत दर गुरुवार आणि शुक्रवारी रात्री ८.३० वाजता सुटेल. पुणे-दानापूर द्वि-साप्ताहिक विशेष गाडी ७ एप्रिल ते ३० जून या कालावधीत दर सोमवार आणि शुक्रवारी रात्री ७.५५ वाजता पुणे येथून सुटेल. दानापूर येथून ९ एप्रिल ते २ जुलै या कालावधीत दर बुधवार आणि रविवारी सकाळी ८.३० वाजता सुटेल. याशिवाय, समस्तीपूर, कन्याकुमारी, आसनसोल, चेन्नई, श्री एम. विश्वेश्वरैया टर्मिनल बंगळुरू आणि गाझीपूरसाठीही विशेष गाड्या चालवण्यात येणार आहेत.