जळगाव : जळगाव जिल्ह्यातील तब्बल ६ हजार ७७९ शेतकरी पीकविमा योजनेतून बाद होण्याची शक्यता आहे. पीकविमा काढलेल्या शेतकऱ्यांनी शेतात केळी लागवड केली आहे की नाही ? याची पडताळणी कृषी विभाग व पीकविमा कंपनीकडून करण्यात आली आहे. मात्र, जिल्ह्यातील तब्बल ६ हजार ७७९ शेतकऱ्यांनी पडताळणीदरम्यान सहकार्य केले नसल्याचे समोर आले आहे.
जळगाव जिल्ह्यात आतापर्यंत ५७ हजार शेतकऱ्यांची पडताळणी पूर्ण झाली आहे. मात्र, जिल्ह्यातील तब्बल ६ हजार ७७९ शेतकऱ्यांनी पीकविमा क्षेत्राची पडताळणीसाठी सहकार्य केलेले नाही, या शेतकऱ्यांचे अर्ज बाद ठरविले जाण्याची शक्यता आहे
कृषी विभागाने आता विमा कंपनीला ५ एप्रिलपर्यंतचा अल्टिमेटम दिला असून, १०० टक्के पडताळणी करून, आपला अंतिम अहवाल सादर करण्याच्या सूचना दिल्या आहेत.
दरम्यान, पीकविमा कंपनीला ३१ मार्चपर्यंत संपूर्ण क्षेत्राची पडताळणी करून, आपला अहवाल सादर करण्याच्या सूचना कृषी विभागाकडून देण्यात आल्या होत्या. मात्र, ३१ मार्चपर्यंत ५७ हजार ९५३ शेतकऱ्यांच्या शेतातील केळीची पडताळणी झाली आहे.
७ हजारहून अधिक शेतकऱ्यांची पडताळणी बाकी
तर अजून ७ हजारहून अधिक शेतकऱ्यांची पडताळणी बाकी आहे. पीकविमा कंपनीकडून अहवाल प्राप्त झाल्यानंतर जिओ टॅगिंगच्या अहवालानंतर बोगस विमाधारकांबाबत कृषी विभाग अंतिम निर्णय घेणार आहे.
