सलग पाच दिवसांपासून तेजीत असलेल्या बाजारात आज घसरण दिसून आली. आजच्या व्यवहारांती बीएसई सेन्सेक्स २०७.८८ अंकांनी घसरून ७७,७७६.५१ वर बंद झाला. तर निफ्टी ५० निर्देशांक ५२.२० अंकांनी नी घसरून २३,६०६.१५ वर बंद झाला. गुंतवणूकदारांच्या सावधगिरीमुळे, जागतिक दरांबद्दलच्या चिंता आणि उच्च पातळीवर नफा बुकिंग, बाजारातील घसरणीला कारण ठरले आहेत. विक्रीच्या दबावामुळे, एनएसईचे १३ पैकी ११ क्षेत्रीय निर्देशांकानी लाल रंगात व्यवहार केला. केवळ निफ्टी प्रायव्हेट बँक आणि आयटी क्षेत्र किरकोळ नफ्यात बंद झाले.
कोणते शेअर्स घसरले ?
बाजारातील घसरणीत, झोमॅटो, इंडसइंड बँक, अदानी पोर्ट्स, महिंद्रा अँड महिंद्रा आणि एसबीआयचे शेअर्स सर्वाधिक तोटा सहन करत ५.५% ने घसरले.
घसरणीमागील ३ मुख्य कारणे
१. जागतिक व्यापार दरांबद्दल चिंता
अमेरिकेचे अध्यक्ष डोनाल्ड ट्रम्प यांनी ऑटोमोबाईल क्षेत्रावर नवीन दर लादण्याचे संकेत दिल्याने गुंतवणूकदार पुन्हा विचलित झाले आहेत. २ एप्रिलपर्यंतनवीन दर लागू केले जाणार नाहीत, परंतु व्हेनेझुएलाकडून तेल किंवा गॅस खरेदी करणाऱ्या देशांवर २५% दुय्यम दर लागू केला जाईल. रॉयटर्सच्या वृत्तानुसार, ट्रम्प त्यांच्या दर धोरणांवर ठाम आहेत. यामुळे, गुंतवणूकदार गोंधळलेल्या स्थितीत आहेत आणि व्यापार धोरणावर स्पष्टता येईपर्यंत नवीन करार टाळत आहेत.
२. नफा बुकिंग
मागील पाच दिवसांपासून बाजारात जोरदार तेजी दिसून आली. निच्चांक पातळीवरून केलेल्या खरेदीची गुंतवणूकदारांनी उच्च पातळीवर नफा बुकिंग केली. विश्लेषकांचा असा विश्वास आहे की अल्पावधीत, बाजाराची दिशा देशांतर्गत मागणीतील सुधारणा आणि कंपन्यांच्या तिमाही निकालांच्या कामगिरीवर अवलंबून असेल.
कोटक सिक्युरिटीज इक्विटी रिसर्चचे प्रमुख श्रीकांत चौहान म्हणाले, “अल्पावधीत, बाजार रचना सकारात्मक राहिली आहे, परंतु जास्त खरेदीमुळे, उच्च पातळीवर विक्री होत आहे. निफ्टीसाठी २३,७००-२३,८०० आणि सेन्सेक्ससाठी ७८,३००-७८,५०० हे महत्त्वाचे रसिस्टन्स आहेत.
३. कमकुवत जागतिक संकेत
जागतिक बाजारपेठांमध्ये, विशेषतः आशियाई बाजारपेठांमध्ये कमकुवतपणाचा भारतीय शेअर बाजारावरही परिणाम झाला. डाऊ जोन्स फ्युचर्स नकारात्मक क्षेत्रात व्यवहार करत होते. दरम्यान, हाँगकाँगचा हँग सेंग निर्देशांक २.२% घसरून २३,३८७.८६ वर आणि शांघाय कंपोझिट निर्देशांक ०.२% घसरून ३,३६४.०५ वर बंद झाला.
