---Advertisement---
नंदुरबार : बसस्थानकात गर्दीचा फायदा घेऊन महिलांच्या गळ्यातील सोन्याची पोत लंपास करणाऱ्या संशयित महिलेस नंदुरबार शहर पोलिसांनी अटक केली. तिच्याकडून ६८ हजार ५०० रुपये किमतीची सोन्याची पोत जप्त करण्यात आली आहे. दरम्यान, आरोपी महिला जालना जिल्हयातील असल्याचे समोर आले आहे. त्यामुळे पोलिसही विचारात पडले असून, या महिलेकडून आणखीही काही चोरीच्या घटना उघड होण्याची शक्यता आहे.
वर्षा कांतिलाल भोसले (३८) रा. हसनाबाद, ता. भोकरदन, जि. जालना असे संशयित आरोपी महिलेचे नाव आहे. बसस्थानकांमध्ये सुट्टया आणि लग्नसराईची गर्दी लक्षात घेता महिलांच्या गळ्यातील सोन्याची पोत लंपास करण्याचे प्रमाण वाढले होते.
शहादा येथे एकाच बसमध्ये तीन महिलांच्या सोन्याची पोत लंपास झाली होती. नंदुरबारातही अनेक घटना घडल्या होत्या. त्यामुळे संशयितांचा शोध घेण्याचे दिवसांपूर्वी नंदुरबार स्थानकात यामिनी पाटील या महिलेच्या गळ्यातून सोन्याची पोत लंपास झाली होती.
या घटनेतील संशयीत महिलेचा शोध घेण्यासाठी बसस्थानकातील सीसीटीव्ही तपासले जात असतांना त्यात संशयीत महिला आढळून आली. त्यानुसार शहर पोलिसांच्यात पथकाने शोध घेतला असता संशयीत वर्षा भोसले ही महिला आढळून आली. तिला ताब्यात घेऊन तिची चौकशी केली असता यामिनी पाटील यांच्या गळ्यातील सोन्याची पोत चोरी केल्याचे कबूल केले. तिच्याकडून ६८ हजार ५०० रुपयांचा मुद्देमाल जप्त करण्यात आला. आणखी काही गुन्हे उघडकीस येण्याची शक्यता आहे.
ही कारवाई पोलिस अधीक्षक श्रवण दत्त एस., अपर अधिक्षक आशित कांबळे, उपविभागीय पोलिस अधिकारी संजय महाजन यांच्या मार्गदर्शनाखाली शहर पोलिस निरीक्षक अमितकुमार मनेळ, सहायक निरिक्षक रवींद्र बागुल, हवालदार निंबा वाघमोडे, हरेश कोळी, ललीत गवळी यांनी केली.
