Wrestler Vikram Parakhi : जिममध्ये व्यायाम करण्यासाठी गेलेल्या पैलवान विक्रम पारखी याचा हृदयविकाराचा झटक्याने दुर्दैवी मृत्यू झाला. पैलवान विक्रम पारखी याचे येत्या 12 डिसेंबरला लग्न होणार होते. मात्र, त्यापूर्वीच काळाने झडप घालून विक्रमचा मृत्यू झाल्याने पारखी कुटुंबावर आनंदा ऐवजी दुःखाचा डोंगर कोसळला आहे.
पुण्यातल्या मुळशी तालुक्यातील माण येथे ही घटना घडली. पैलवान विक्रम पारखी याने कुमार महाराष्ट्र केसरी पदावर आपलं नाव कोरून मानाची गदा मिळवली होती. २८ नोव्हेंबर २०१४ ला वारजे येथे महाराष्ट्र राज्य कुस्तीगीर परिषद आयोजित महाराष्ट्र राज्य कुमार अजिंक्यपद कुस्ती स्पर्धा २०१४ झाली होती. त्यात विक्रम याने अजिंक्यपद मिळवले.
विक्रम याने अनेक राष्ट्रीय पदकं आणि किताब मिळवले. आंतरराष्ट्रीय स्तरावर देखील कुस्ती स्पर्धेत सहभाग घेतला होता. अनेक पदकं आणि किताब आपल्या नावावर करत विक्रम करणारा हा पैलवान युवा पैलवनांसाठी आदर्श होता. कुस्ती क्षेत्रात त्याला आदर्श आणि गुणी खेळाडू म्हणून ओळख होती.
झारखंड इथल्या रांचीमध्ये राष्ट्रीय कुस्ती स्पर्धेत त्याने ब्राँझ पदक मिळवले होते. मुळशीतल्या माले केसरी स्पर्धेचा विजेता बनवून माले केसरी किताब आणि गदा मिळवली होती. अशा अनेक नामांकित कुस्ती स्पर्धेत माण गावचे आणि मुळशी तालुक्याचे नाव विक्रम पारखी याने उंचावले होते.
विक्रम पारखी याच्या आकस्मिक जाण्याने पारखी कुटुंबावर दुःखाचा डोंगर कोसळला आहे. त्याचे वडील शिवाजीराव पारखी हे निवृत्त सैनिक आहेत, कारगिल युद्धातही त्यांनी सहभाग घेतला होता. विक्रम याच्यामागे आई- वडील, विवाहित एक भाऊ आणि एक बहीण असा परिवार आहे.
