नवी दिल्ली: भारतीय संघ गेल्या काही काळापासून मधल्या फळीतील अडचणीतून जात आहे. केएल राहुल आणि श्रेयस अय्यर यांच्या अनुपस्थितीत भारतीय मधली फळी अत्यंत कमकुवत ठरत होती. आता या दोन्ही खेळाडूंनी आशिया कपद्वारे संघात पुनरागमन केले आहे. आशिया चषकात चांगली कामगिरी केल्यानंतर हे दोघेही विश्वचषक संघात प्रवेश मिळवण्याचा प्रयत्न करतील. चौथ्या क्रमांकाचे स्थान भारतीय संघासाठी डोकेदुखी ठरले आहे.
या स्थानावर श्रेयस अय्यरने संघासाठी अनेक उत्कृष्ट खेळी खेळल्या आहेत. आशिया कपमध्ये पुन्हा एकदा सर्वांच्या नजरा त्याच्यावर असतील. श्रेयस अय्यरने आशिया चषकात या स्थानावर दमदार कामगिरी केली तर, विश्वचषकासाठीही त्याचा संघात समावेश होणार हे जवळपास निश्चित आहे.
चौथ्या क्रमांकावर असलेल्या श्रेयस अय्यरचा रेकॉर्ड उत्कृष्ट राहिला आहे. भारतासाठी एकदिवसीय सामन्यांमध्ये, त्याने आतापर्यंत एकूण 20 वेळा चौथ्या क्रमांकावर फलंदाजी केली आहे. यादरम्यान त्याच्या बॅटमधून 47.35 च्या सरासरीने 805 धावा झाल्या आहेत. यादरम्यान त्याचा स्ट्राईक रेटही उत्कृष्ट राहिला आहे. अय्यरने 94.37 च्या स्ट्राइक रेटने धावा केल्या आहेत. त्याने दोन शतके आणि 5 अर्धशतकेही झळकावली आहेत. श्रेयस अय्यर भारताकडून प्रथमच एकदिवसीय विश्वचषकात सहभागी होणार आहे.
अशा परिस्थितीत संघासाठी काही मॅच विनिंग इनिंग खेळण्याचा त्याचा प्रयत्न असेल. कर्णधार रोहित शर्मा आणि प्रशिक्षक राहुल द्रविड यांचा अय्यरवर खूप विश्वास आहे. त्यामुळेच दुखापतीनंतर आशिया चषकसारख्या मोठ्या स्पर्धेत त्याचा थेट संघात समावेश करण्यात आला आहे. अय्यर बर्‍याच काळानंतर प्रथमच पाकिस्तानविरुद्ध एकदिवसीय सामन्यात खेळणार आहे.
