जळगाव : भुसावळकडून जळगावकडे येणारा एका दुचाकीस्वराचा अज्ञात ट्रकच्या धडकेत मृत्यू झाला आहे. खेडी फाट्याजवळ झालेल्या अपघातात ३८ वर्षीय तरुणाचा जागीच मृत्यू झाला आहे. याप्रकरणी एमआयडीसी पोलीस ठाण्यात गुन्हा दाखल करण्यात आला आहे.
महेंद्र एकनाथ बोंडे (वय ३८, रा. गणेश कॉलनी, भुसावळ) असे मयत तरुणाचे नाव आहे. महेंद्र बोंडे हा तरुण आई-वडील यांच्यासह भुसावळ शहरात वास्तव्यास होता. तो जळगाव येथील एमआयडीसीतील गणेश अल्युमिनियम कंपनीमध्ये कामाला होता. दररोज भुसावळ ते जळगाव असा दुचाकीने अपडाऊन करत होता. नेहमीप्रमाणे शनिवारी २९ मार्च रोजी सकाळी महेंद्र हा दुचाकीने भुसावळकडून जळगावला येण्यासाठी निघाला. जळगाव खेडी फाट्याजवळ अज्ञात ट्रकने त्याला जोरदार धडक दिली. त्यामुळे तो रोडवर पडला आणि त्याला ट्रकने चिरडले. त्यात महेंद्र बोंडे हा जागीच ठार झाले.
अपघात घडल्यानंतर ट्रक चालक ट्रक घेऊन पसार झाला. घटनेची माहिती मिळाल्यानंतर एमआयडीसी पोलीस ठाण्याचे पोलीस कर्मचाऱ्यांनी घटनास्थळी दाखल झाले. पंचनामा करून मृतदेह शासकीय वैद्यकीय महाविद्यालयात दाखल करण्यात आला. या प्रकरणी एमआयडीसी पोलीस ठाण्यात गुन्हा नोंदवण्यात आला असून पुढील तपास सुरू आहे.
