पाचोरा: तालुक्यातील गोराडखेडा गावाजवळ स्विफ्ट कार अपघातात एका शालेय विद्यार्थिनीसह वृद्ध ठार तर दोन गंभीररित्या जखमी झाल्याची घटना ४ रोजी पावणे सहा वाजेच्या सुमारास घडली. पोलिसांनी कार चालकास ताब्यात घेतले आहे. संतप्त ग्रामस्थांनी महामार्गावर रास्ता रोको केला. रात्री उशिरापर्यंत चालकाविरोधात गुन्हा दाखल करण्याचे काम पोलिसांकडून सुरू होते.पाचोऱ्याकडून जळगावकडे भरधाव वेगाने जाणाऱ्या लाल रंगाच्या स्विफ्ट कारने गोराडखेडा बसस्टॅन्डजवळ जोरदार धडक दिल्याने एका विद्यार्थिनीसह वृद्ध जागीच ठार तर दोन जण गंभीर जखमी झाले आहेत.
४ रोजी सायंकाळी ५:४५ वाजेच्या सुमारास ही घटना घडली असून गंभीर जखमी परशुराम दगा पाटील नामक इसमास जळगाव हलविण्यात आले आहे. एका शालेय विद्यार्थिनीच्या हातास गंभीर इजा पोहचली आहे, तर शाळेतून घरी जात असलेली विद्यार्थीनी दिव्या भगवान पाटील (क्य १५) व वृद्ध सुभाष रामा पाटील (वय ६२) या दोघांचा भीषण दुर्घटनेत दुर्दैवी मृत्यू झाला असून रुग्णवाहिका चालक किशोर लोहार यांच्या मदतीने मयतांना पाचोरा ग्रामीण रुग्णालयात आणण्यात आले. घटनेची माहिती मिळताच पोलीस निरीक्षक राहुल खताळसह पोलिसांनी घटनास्थळी धाव घेतली. या दुर्दैवी घटनेने परिसर हादरला आहे. संतप्त ग्रामस्थांनी चालकास ताब्यात द्या अशी मागणी करीत रास्ता रोको केला. पोलीस प्रशासन घटनास्थळी नजर ठेवून होते. रात्री उशिरापर्यंत आरोपी चालकाविरोधात गुन्हा दाखल करण्याची प्रक्रिया सुरू होती.
