जळगाव : जिल्ह्यास ९० हजार नवीन घरकुलांचे उद्दिष्ट असून, आतापर्यंत ८४ हजार ६०० घरकुलांना मंजुरी देण्यात आली आहे. उद्दिष्ट वेळेत पूर्ण व्हावे यासाठी संबंधित यंत्रणांनी शबरी, रमाई, पंतप्रधान आणि मोदी आवास या चारही घरकुल योजनांच्या कामांना गती द्यावी, असे निर्देश केंद्रीय क्रीडा व युवक कल्याण राज्यमंत्री रक्षा खडसे यांनी दिले. दरम्यान, या योजनांमधील पात्र लाभार्थी वंचित राहू नयेत यासाठी आवश्यक उपाययोजना करण्याचे निर्देश वस्त्रोद्योगमंत्री संजय सावकारे यांनी दिले.
जिल्ह्यातील उपविभागीय अधिकारी, तहसीलदार, गटविकास अधिकारी, वन विभाग आणि इतर संबंधित विभागांच्या अधिकाऱ्यांची विकासकामांबाबत नियोजन विभागाच्या सभागृहात बैठक घेण्यात आली. बैठकीला जिल्हाधिकारी आयुष प्रसाद, जिल्हा परिषदेचे मुख्य कार्यकारी अधिकारी श्रीअंकित, ग्रामीण विकास यंत्रणेचे प्रकल्प संचालक राजीव लोखंडे, वनविभागाचे उपवनसंरक्षक (वन्यजीव) जमीर शेख, जळगाव वनविभागाचे उपवनसंरक्षक प्रवीण ए.. जिल्हा शल्यचिकित्सक किरण पाटील यांच्यासह उपविभागीय अधिकारी, तहसीलदार, गटविकास अधिकारी आणि विविध विभागांचे अधिकारी उपस्थित होते.
१५ जूनपूर्वी पात्र लाभार्थीना घरे देण्याचे उद्दिष्ट
शासनाने मागील आणि विद्यमान घरकुल योजनांसह एकूण एक लाख ६० हजार ग्रामीण परकुलांचे उद्दिष्ट निश्चित केले आहे. १५ जूनपूर्वी ही घरे पूर्ण करण्याचे निर्देश देण्यात आले आहेत. पंतप्रधान नरेंद्र मोदी आणि मुख्यमंत्री देवेंद्र फडणवीस यांनी दिलेल्या १०० दिवसांच्या कृती आराखड्यानुसार, घरकुल योजना प्राधान्याने पूर्ण करावी, असे निर्देश केंद्रीय राज्यमंत्री खडसे यांनी दिले.
जिल्ह्यात २१ हजार लाभार्थीना जागा उपलब्ध
घरकुल योजनांसाठी पात्र असलेल्या, पण स्वमालकीची जागा नसलेल्या २१ हजार लाभार्थीना जिल्हा प्रशासनाने शासकीय नियमानुसार जागा उपलब्ध करून दित्याची माहिती जिल्हाधिकारी प्रसाद यांनी दिली.
यावल येथे ग्रामीण रुग्णालयः चोपड्यात आयुष रुग्णालय
यावल येथे ग्रामीण रुग्णालयासाठी आठवडाभरात जागा उपलब्ध करून देण्याचे आणि चोपडा येथे आयुष रुग्णालय उभारण्यासाठी तत्काळ कार्यवाही करण्याचे निर्देश केंद्रीय राज्यमंत्री खडसे यांनी दिले. जिल्हाधिकारी प्रसाद यांनीही उपविभागीय अधिकारी आणि तहसीलदारांना तातडीने कार्यवाही करण्याचे आदेश दिले.
सेंद्रिय शेतीला प्रोत्साहन
आदिवासी विभागाच्या तीन हजार हेक्टर जमिनीवर सेंद्रिय मिरची लागवड करण्याचा निर्णय घेण्यात आला आहे. आदिवासी शेतकऱ्यांच्या जमिनी अजूनही नैसर्गिक असल्याने त्यांना सेंद्रिय शेतीसाठी प्रोत्साहन द्यावे. विशेषतः भाजीपाल्याला चांगला दर मिळू शकतो, यासाठी प्रशासनानेही प्रयत्न करावेत, असे आवाहन केंद्रीय राज्यमंत्री खडसे यांनी केले.
वस्त्रोद्योग मंत्र्यांकडून ‘पेसा’ गाव सर्वेक्षणाचे कौतुक
कवयित्री बहिणाबाई चौधरी उत्तर महाराष्ट्र विद्यापीठाच्या समाजकार्य विभागाच्या सहकार्याने जिल्हा प्रशासनाने ‘पेसा’ अंतर्गत आदिवासी गावांतील सोयी-सुविधांचे सर्वेक्षण केले. यात पक्की व कच्ची घरे, पाणीपुरवठा (कूपनलिका व सार्वजनिक विहिरी), साक्षरता, शिक्षण, आरोग्य सुविधा आदी घटकांचा समावेश होता. या सर्वेक्षणामुळे गावागावातील सोयी-सुविधांची स्पष्टता मिळाली. वस्त्रोद्योगमंत्री संजय सावकारे यांनी या उपक्रमाचे कौतुक केले.
