---Advertisement---
Jayshree Patil : मुंबई : सांगलीमध्ये काँग्रेसला मोठा धक्का बसला आहे. काँग्रेसचे दिग्गज नेते मदन पाटील यांच्या पत्नी जयश्री पाटील यांनी भाजपमध्ये प्रवेश केला आहे. यामुळे सांगलीच्या राजकारणात भाजपला बळकटी मिळाली आहे.
जयश्री पाटील या ज्येष्ठ काँग्रेस नेते आणि माजी मंत्री दिवंगत मदन पाटील यांच्या पत्नी आहेत. उच्च आणि तंत्रशिक्षण मंत्री चंद्रकांत पाटील यांनी यापूर्वी जयश्री पाटील यांची त्यांच्या निवासस्थानी भेट घेतली होती. त्यानंतर बुधवारी जयश्री पाटील यांनी मुख्यमंत्री देवेंद्र फडणवीस, चंद्रशेखर बावनकुळे आणि इतर नेत्यांच्या उपस्थितीत भाजपमध्ये प्रवेश केला.
विधानसभा निवडणुकीत जयश्री पाटील यांना तिकीट देण्यात आले नव्हते. त्यांनी बंडखोरी करून अपक्ष म्हणून निवडणूक लढवली. त्यानंतर काँग्रेसने त्यांना निलंबित केले. यानंतर त्यांनी वेगळा राजकीय मार्ग निवडण्याचा निर्णय घेतला. काही दिवसांपूर्वी त्यांनी कार्यकर्त्यांचे मत मागितले होते. त्यांना भाजप आणि राष्ट्रवादी काँग्रेसकडून ऑफर आल्या होत्या. अखेर त्यांनी भाजपमध्ये सामील होण्याचा निर्णय घेतला.
सांगली विधानसभा मतदारसंघात काँग्रेसने आतापर्यंत १६ निवडणुका जिंकल्या आहेत. १९८० मध्ये इंदिरा गांधींच्या विनंतीवरून वसंत पाटील यांनी स्वतः निवडणूक लढवली. त्यानंतर वसंत पाटील यांच्या कुटुंबातील सदस्यांनी सलग दहा निवडणुका लढवल्या आणि जिंकल्या. वसंत पाटील यांच्यासोबत शालिनीताई पाटील, प्रकाश बापू पाटील, मदन पाटील, प्रतीक पाटील आणि विशाल पाटील यांनी आतापर्यंत लोकसभा निवडणूक लढवली आहे.
सांगली निवडणुकीत वसंतदादा कुटुंबाचे वर्चस्व
२००९ मध्ये प्रतीक पाटील विजयी झाल्यानंतर त्यांना केंद्रीय मंत्रिमंडळात राज्यमंत्री बनवण्यात आले. मात्र, २०१४ च्या निवडणुकीत प्रतीक पाटील यांचा पराभव झाला. त्यानंतर २०१९ मध्ये काँग्रेसने विशाल पाटील यांना लोकसभेचे उमेदवार बनवले नाही. सांगलीची जागा शेतकरी संघटनेसाठी सोडण्यात आली. विशाल पाटील यांनी २०१९ च्या लोकसभा निवडणुकीत निवडणूक लढवली. मात्र, या निवडणुकीत त्यांना पराभवाला सामोरे जावे लागले. २०२४ च्या लोकसभा निवडणुकीत महाआघाडीकडून काँग्रेसला एकही जागा मिळाली नाही. त्यामुळे विशाल पाटील यांनी बंडखोरी केली आणि ते अपक्ष खासदार म्हणून निवडून आले.
