---Advertisement---
जळगाव : गोदावरी नर्सिंग महाविद्यालयाचे रजिस्ट्रार प्रवीण कोल्हे यांचे भीषण अपघातात दुर्दैवी निधन झाल्याची घटना समोर आली आहे. पिंपरूड फाट्याजवळ झालेल्या या अपघातात ते गंभीर जखमी झाले होते. उपचारासाठी त्यांना तातडीने गोदावरी रुग्णालयात दाखल करण्यात आले होते. मात्र उपचारादरम्यान त्यांची प्राणज्योत मालवली. या घटनेमुळे गोदावरी फाउंडेशनसह संपूर्ण शैक्षणिक क्षेत्रात शोककळा पसरली आहे.
अपघाताबाबत मिळालेल्या माहितीनुसार, प्रवीण कोल्हे हे आपल्या कुटुंबासह चुलत भावाच्या लग्नसमारंभासाठी गेले होते. कार्यक्रम आटोपून ते रात्री उशिरा परतत असताना पिंपरूड फाट्याजवळ त्यांच्या वाहनाला अपघात झाला. अपघात इतका भीषण होता की वाहनाचे मोठे नुकसान झाले. या दुर्घटनेत प्रवीण कोल्हे गंभीर जखमी झाले तर त्यांच्या कुटुंबातील इतर सदस्यांनाही दुखापत झाली.
घटनेनंतर स्थानिक नागरिकांनी तातडीने मदतकार्य सुरू करत जखमींना जवळच्या रुग्णालयात हलवले. त्यानंतर प्रवीण कोल्हे यांच्यावर गोदावरी रुग्णालयात उपचार सुरू करण्यात आले होते. डॉक्टरांनी त्यांना वाचवण्यासाठी शर्थीचे प्रयत्न केले, मात्र उपचारादरम्यान त्यांचे निधन झाले. त्यांच्या निधनाची बातमी समोर येताच गोदावरी नर्सिंग महाविद्यालय परिसरात शोक व्यक्त करण्यात आला.
प्रवीण कोल्हे हे शांत, मनमिळावू आणि कर्तव्यदक्ष अधिकारी म्हणून ओळखले जात होते. महाविद्यालयाच्या प्रशासकीय कामकाजात त्यांनी महत्त्वाची भूमिका बजावली होती. विद्यार्थ्यांपासून शिक्षकांपर्यंत सर्वांशी त्यांचे चांगले संबंध होते. त्यांच्या अकाली निधनामुळे महाविद्यालयाचे मोठे नुकसान झाल्याची भावना व्यक्त केली जात आहे.
या अपघाताची नोंद संबंधित पोलिस ठाण्यात करण्यात आली असून पोलिसांकडून पुढील तपास सुरू आहे. अपघाताचे नेमके कारण काय, याचा शोध घेतला जात आहे. प्रवीण कोल्हे यांच्या पश्चात कुटुंबीयांवर दुःखाचा डोंगर कोसळला असून विविध स्तरांतून त्यांना श्रद्धांजली अर्पण करण्यात येत आहे.
