भारताला मिळणार सहा आखाती देशांसाठी एकीकृत पर्यटन व्हिसा

गल्फ कोऑपरेशन कौन्सिल मध्य पूर्वेतील प्रवासाचा अनुभव पूर्णपणे बदलण्यासाठी एकीकृत पर्यटन व्हिसा सुरू करण्याची तयारी करत आहे. या अंतर्गत, प्रवाशांना फक्त एका व्हिसाने संयुक्त अरब अमिराती, सौदी अरेबिया, कतार, बहरीन, कुवेत आणि ओमानमध्ये प्रवास करण्याची परवानगी दिली जाईल.

हा उपक्रम युरोपच्या शेंजेन व्हिसा मॉडेलने प्रेरित आहे आणि आखाती देशांमधील सखोल प्रादेशिक एकात्मतेच्या दिशेने एक ऐतिहासिक पाऊल मानले जाते. नोव्हेंबर २०२३ मध्ये ओमानमध्ये झालेल्या अंतर्गत मंत्र्यांच्या बैठकीत ही व्हिसा योजना औपचारिकरित्या मंजूर करण्यात आली होती.

सरचिटणीस जसेम अल बुदाईवी यांनी सहकार्य आणि दूरदर्शी नेतृत्वाने प्रेरित होऊन ही कामगिरी केली असे म्हटले. ते म्हणाले, हा एकीकृत व्हिसा आमच्या नेत्यांची एकता आणि प्रादेशिक सहकार्यासाठी क्चनबद्धता दर्शवितो. ही व्हिसा प्रणाली ईयूच्या शेंजेन व्हिसाइतकीच काम करेल, ज्यामध्ये पर्यटकांना प्रत्येक देशासाठी स्वतंत्र व्हिसा घेण्याची आवश्यकता राहणार नाही.

एकाच अजनि सर्व सहा देशांमध्ये प्रवेश शक्य होईल. हा व्हिसा ३० ते ९० दिवसांसाठी वैध असेल आणि तो केवळ ऑनलाइन पोर्टलद्वारे अर्ज करता येईल. जरी हा व्हिसा केवळ पर्यटन आणि कुटुंब भेटीसाठी वैध असेल, तरी त्याचा फायदा हॉस्पिटॅलिटी, एव्हिएशन आणि रिटेल क्षेत्रांना होईल अशी अपेक्षा आहे.

अर्ज करण्यासाठी आवश्यक कागदपत्रे

• किमान ६ महिन्यांसाठी वैध पासपोर्ट
• पासपोर्ट आकाराचा फोटो
• ऑनलाइन अर्ज फॉर्म
• यजमानाकडून हॉटेल बुकिंग किंवा निमंत्रण पत्र
• प्रवास विमा
• पुरेसे निधी असल्याचा पुरावा (जसे की बँक स्टेटमेंट)
• परतीचे किंवा पुढील प्रवासाचे तिकीट
• व्हिसा शुल्क ऑनलाइन भरावे लागेल आणि मंजूर व्हिसा ईमेलद्वारे पाठवला जाईल, जो प्रिंट किंवा डिजिटल स्वरूपात सादर केला जाऊ शकतो.