---Advertisement---
Asia Cup 2025 : २०२५ च्या आशिया कपदरम्यान एक वाईट बातमी समोर आली आहे. एका तरुण खेळाडूने त्याच्या वडिलांना गमावले आहे. १८ सप्टेंबर रोजी अबू धाबी येथे झालेल्या श्रीलंका आणि अफगाणिस्तान यांच्यातील सामन्यात हा खेळाडू सहभागी होता. मात्र, सामन्यादरम्यान त्याच्या वडिलांचे निधन झाले. सामन्यानंतर खेळाडूंना ही बातमी कळताच संपूर्ण संघात शोककळा पसरली असून, आता हा खेळाडू स्पर्धेच्या आगामी सामन्यांमध्ये सहभागी होऊ शकेल की नाही याबाबत प्रश्न निर्माण झाला आहे.
श्रीलंकेचा उदयोन्मुख क्रिकेटपटू दुनिथ वेलागे यांना मोठा धक्का बसला आहे. त्यांचे वडील सुरंगा वेलागे यांचे निधन झाले आहे. ही दुःखद घटना त्याच दिवशी घडली जेव्हा दुनिथ आशिया कपमध्ये अफगाणिस्तानविरुद्ध खेळत होता. श्रीलंकेने हा सामना दणदणीत जिंकला आणि सुपर फोरमध्ये स्थान मिळवले. वेलागे सामन्यात सहभागी झाला, परंतु सामना संपल्यानंतर त्याला त्याच्या वडिलांच्या मृत्यूची बातमी मिळाली.
या घटनेनंतर वेलागे घरी परतला असून, आता तो आशिया कपच्या उर्वरित सामन्यांमध्ये सहभागी होईल की नाही याबाबत प्रश्न निर्माण झाला आहे. श्रीलंकेला आता सुपर फोरमध्ये बांगलादेश, पाकिस्तान आणि भारत सारख्या बलाढ्य संघांचा सामना करावा लागणार आहे आणि वेलागेची अनुपस्थिती संघासाठी आव्हानात्मक ठरू शकते.
मृत्यूचे कारण अद्याप उघड झालेले नाही, परंतु काही माध्यमांच्या वृत्तानुसार या घटनेचा संबंध सामन्याशी जोडला जात आहे. खरं तर, अफगाणिस्तानच्या डावातील शेवटचे षटक, दुनिथ वेलागेने टाकले, ते खूप महागडे ठरले. मोहम्मद नबीने या षटकात पाच षटकार मारले आणि एकूण ३२ धावा दिल्या. मीडिया रिपोर्ट्सनुसार, या षटकानंतरच दुनिथ वेलागेच्या वडिलांना हृदयविकाराचा झटका आला. तथापि, श्रीलंका क्रिकेट बोर्डाने अद्याप या घटनेची कोणतीही माहिती जारी केलेली नाही.
---Advertisement---
सोशल मीडियावर एक व्हिडिओ देखील व्हायरल होत आहे. या व्हिडिओमध्ये श्रीलंकेचे प्रशिक्षक सनथ जयसूर्या आणि संघ व्यवस्थापक दुनिथ वेलागेला सामन्यानंतर त्याच्या वडिलांच्या मृत्यूची माहिती देताना दिसत आहेत. दरम्यान, जेव्हा अफगाणिस्तानचा दिग्गज अष्टपैलू मोहम्मद नबीला सामन्यानंतर या घटनेची माहिती मिळाली तेव्हा त्याला देखील धक्का बसला.
