वैष्णवी हगवणे हुंडाबळी प्रकरणात ९ महिन्यानंतर मोठी अपडेट, न्यायालयाने…

राज्यभर चर्चेत आलेल्या वैष्णवी हगवणे हुंडाबळी प्रकरणात न्यायालयीन स्तरावर महत्त्वाची अपडेट समोर आली आहे. सत्र न्यायालयाने या प्रकरणातील सहा आरोपींविरुद्ध आरोप निश्चित केले असून खटल्याची नियमित सुनावणी 23 फेब्रुवारीपासून सुरू होणार आहे. त्यामुळे काही काळ शांत झालेल्या या प्रकरणाकडे पुन्हा एकदा सर्वांचे लक्ष लागले आहे.

या प्रकरणात पिंपरी-चिंचवड पोलिसांनी 14 जुलै रोजी एकूण 11 जणांविरोधात आरोपपत्र दाखल केले होते. मृत्यूनंतर तब्बल 58 दिवसांनी हे आरोपपत्र न्यायालयात सादर करण्यात आले. आरोपपत्रात राजेंद्र हगवणे, त्यांची पत्नी, दोन मुलगे, एक मुलगी आणि इतर सहा जणांचा समावेश होता. आता त्यापैकी सहा जणांविरुद्ध सत्र न्यायालयाने औपचारिकपणे आरोप निश्चित केले आहेत.

घटनेचा उलगडा 16 मे रोजी झाला. भुकूम येथील सासरी वैष्णवी हगवणे हिचा मृतदेह पंख्याला गळफास घेतलेल्या अवस्थेत आढळला. सुरुवातीला हा आत्महत्येचा प्रकार असल्याचा अंदाज व्यक्त करण्यात आला; मात्र शवविच्छेदन अहवालात शरीरावर जखमांचे चिन्ह आढळल्याने संशय अधिक गडद झाला. आत्महत्या की खून, हा प्रश्न उपस्थित झाला आणि प्रकरणाने राज्यभरात मोठी खळबळ उडवली. हगवणे कुटुंबाची राजकीय पार्श्वभूमी असल्याने तपास प्रक्रियेबाबतही चर्चा आणि टीका सुरू झाली.

तपासादरम्यान पोलिसांनी वैष्णवीचे पती शशांक हगवणे, सासू लता हगवणे, नणंद करिश्मा हगवणे, सासरे राजेंद्र हगवणे, दीर सुशील हगवणे आणि कुटुंबीय मित्र निलेश चव्हाण यांना अटक केली. या सर्वांवर हुंडाबळी, आत्महत्येस प्रवृत्त करणे, छळ आणि मारहाण, गुन्हेगारी कट तसेच पुरावे नष्ट करण्याचे आरोप ठेवण्यात आले आहेत.

विशेष म्हणजे, निलेश चव्हाण याच्यावर वैष्णवीच्या अल्पवयीन मुलाला बेकायदेशीररीत्या ताब्यात ठेवून धमकावल्याचा अतिरिक्त आरोपही ठेवण्यात आला आहे. वैष्णवीच्या वडिलांनी 17 मे रोजी दिलेल्या फिर्यादीवरून गुन्हा दाखल झाला होता. त्यानंतर पोलिसांनी तपासाचा वेग वाढवत जुलै महिन्यात सविस्तर आरोपपत्र न्यायालयात सादर केले.

आता न्यायालयाने आरोप निश्चित केल्याने खटल्याच्या सुनावणीला औपचारिक सुरुवात होणार आहे. 23 फेब्रुवारीपासून सुरू होणाऱ्या या सुनावणीकडे राज्यभरातील नागरिकांचे लक्ष लागले आहे.