---Advertisement---
मध्यपूर्वेत वाढलेल्या तणावाचा थेट परिणाम सोन्या-चांदीच्या बाजारावर दिसू लागला आहे. अमेरिकेच्या समर्थनासह इस्रायलने इराणवर हल्ला केल्यानंतर परिस्थिती अधिकच चिघळली असून इराणकडूनही प्रत्युत्तर दिले जात आहे. या घडामोडींमुळे जागतिक गुंतवणूकदारांमध्ये अस्वस्थता निर्माण झाली आहे. सुरक्षित गुंतवणुकीचा पर्याय मानल्या जाणाऱ्या सोन्या-चांदीकडे पुन्हा एकदा मोठ्या प्रमाणात कल वाढताना दिसतो आहे.
या पार्श्वभूमीवर जळगावच्या सराफ बाजारात अभूतपूर्व वाढ नोंदवली गेली आहे. अवघ्या दोन तासांत सोन्याच्या दरात तब्बल १,५०० रुपयांची उसळी आली. एका दिवसात मिळून जवळपास ८ हजार रुपयांनी दर वाढल्याची नोंद झाली आहे. चांदीही याला अपवाद ठरलेली नाही. चांदीच्या किमतीत एकाच दिवशी सुमारे २० हजार रुपयांची वाढ झाली आहे. वाढत्या दरांमुळे सामान्य नागरिकांच्या खरेदी क्षमतेवर मोठा परिणाम होत आहे.
सध्या १० ग्रॅम सोन्याची किंमत जीएसटीसह १ लाख ७२ हजार १० रुपयांवर पोहोचली आहे. आतापर्यंतच्या दरवाढीत ही सर्वात मोठी झेप मानली जात आहे. चांदीचा दरही २ लाख ९८ हजार ७०० रुपयांपर्यंत गेला आहे.
दरवाढीमागील प्रमुख कारण म्हणजे वाढलेला भू-राजकीय तणाव. शनिवारी अमेरिकेच्या पाठिंब्याने इस्रायलने इराणवर क्षेपणास्त्र हल्ले केले. राष्ट्रपती कार्यालय, गुप्तचर यंत्रणा, विमानतळ तसेच सरकारी निवासस्थाने या ठिकाणी लक्ष्य साधण्यात आल्याची माहिती समोर आली आहे. यामुळे मध्यपूर्वेत संघर्ष अधिक तीव्र झाला आहे. आधीच रशिया-युक्रेन युद्ध, अफगाणिस्तान आणि पाकिस्तानमधील तणाव सुरू असताना या नव्या संघर्षामुळे जागतिक स्तरावर अनिश्चिततेचे वातावरण निर्माण झाले आहे.
अशा वेळी गुंतवणूकदार शेअर बाजारातील जोखीम टाळून सोन्या-चांदीसारख्या सुरक्षित पर्यायांकडे वळतात. मागणीत वाढ झाली की किमतीत उसळी येणे स्वाभाविक असते. सध्याच्या परिस्थितीतही तेच चित्र दिसत आहे. जागतिक घडामोडींचा वेग पाहता, येत्या काळात सोन्या-चांदीच्या दरात आणखी वाढ होण्याची शक्यता वर्तवली जात आहे.
