तरुण भारत लाईव्ह न्यूज । ९ डिसेंबर २०२२ । नाशिक-सिन्नर महामार्गावर मोदरी घाटात सायंकाळी पाचच्या सुमारास तीन वाहनांच्या विचित्र अपघात झाला. यात नाशिक येथील एका नामांकित महाविद्यालयातील पाच विद्यार्थ्यांचा जागीच मृत्यू झाल्याची माहिती असून काही जखमींना सिन्नर येथील खाजगी रुग्णालयात तर काहींना नाशिकच्या खाजगी रुग्णालयात उपचारासाठी दाखल करण्यात आले आहे. त्यातील दोन ते तीन विद्यार्थ्यांची प्रकृती चिंताजनक असल्याची माहिती समोर येत आहे.
मिळालेल्या माहितीनुसार दुभाजक तोडून कार पलीकडून येत असलेल्या दोन वाहनांवर आदळली. नाशिक येथील एका नामांकित महाविद्यालयामधील 8 ते 9 विद्यार्थी स्विफ्ट कारने मित्राच्या लग्नासाठी गेले होते. सायंकाळी नाशिकला परतत असताना मोहदरी घाटातील गणपती मंदिराजवळ त्यांच्या कारचे अचानक टायर फुटले. त्यामुळे चालकाचे कारवरील नियंत्रण सुटल्याने कार थेट डिव्हायडर वरून पलटी घेत सिन्नरकडे येणाऱ्या इनोवा व स्विफ्ट कारवर येऊन धडकली.
दरम्यान, कारमधील हरीश बोडके, सायली पाटील, शुभम ताडगे व अन्य दोन (अद्याप नावे समजू शकले नाही) या विद्यार्थ्यांचा जागीच मृत्यू झाला. तर साक्षी घायाळ, साहिल वरके, गायत्री फड व ईनोवा कारमधील सुनील दत्तात्रय दळवी व अन्य दोन तीन जण गंभीर जखमी झाले आहेत.
