फेसबुक वरील जाहिरात पाहून अहमदाबाद येथील एका व्यक्तीची एक लाखत फसवणूक झाल्याचा प्रकार समोर आला आहे. मुक्ताईनगर तालुक्यातील धामणगाव येथून हा प्रकार उघडकीस आला आहे. या प्रकरणी भुसावळ बाजारपेठ पोलिसांनी दोन आरोपींना ताब्यात घेतल आहे.
मिळालेल्या माहितीनुसार, अहमदाबाद येथील व्यवसायाने टेलर असलेले नदीम अब्दुल सलाम सैफी हे मूळचे उत्तरप्रदेशातील हमीरपूर येथील रहिवाशी आहेत. त्यांनी काही दिवसांपूर्वी फेसबुक वरील जाहिरात पाहिली. ज्यात 1 लाख रुपयांच्या मोबदल्यात 7 लाख रुपये मिळतील, असा मजकूर लिहण्यात आला होता. यानंतर त्यांनी संशयीतांशी संपर्क साधला असता यासाठी मुक्ताईनगरला यावे लागेल, असे त्यांना सांगण्यात आले.
यानंतर नदीम हे शनिवारी १५ मार्च रोजी दुपारी १.३० वाजता रेल्वेने भुसावळात आले. भुसावळमध्ये आल्यानंतर ते बसने मुक्ताईनगरला आले. यानंतर संशयित आरोपींनी त्यांना घेण्यासाठी रिक्षा पाठवली आणि धामणगाव येथे आणले. यावेळी 1 लाख रुपये दिल्यानंतर त्यांना पाचशे रुपयांच्या चलनी नोटांचे प्लॅस्टिक पिशवीत ठेवलेले 14 बंडल देण्यात आले.
पैसे मिळाल्यानंतर नदीम हे भुसावळात मुक्कामी थांबलेल्या सायली हॉटेलमध्ये आले. त्यांनी रात्री या नोटांचे बंडल उघडून पाहिले. मात्र या बंडलच्या पहिली आणि शेवटची नोट फक्त पाचशे रुपयांची होती. आतील सर्व नोटांवर ‘भारतीय बच्चों का बैंक’ असे लिहिले होते. या सर्व नोटा लहान मुलांच्या खेळण्यातील असल्याने नदीम यांना मोठा धक्का बसला.
आपली फसवणूक झाल्याचे लक्षात येताच त्यांनी लागलीच भुसावळ बाजारपेठ पोलीस ठाण्यात या प्रकरणी तक्रार दाखल केली. याप्रकरणी संशयित आरोपी मनजितसिंग उर्फ गोकुळ दशरथ पवार, अविनाश रुबासन पवार आणि एका अनोळखीविरोधात गुन्हा दाखल करण्यात आला. बाजारपेठ पोलिसांनी मुक्ताईनगर पोलिसांची मदत घेत संशयित आरोपी मनजितसिंग उर्फ गोकुळ दशरथ पवार, अविनाश पवार यांना अटक केली आहे. या दोघांना तीन दिवस पोलीस कोठडी सुनावण्यात आली.
