चोपडा : तालुक्यातील अडावद पोलिस ठाण्याचे पोलिस कर्मचारी संजय आत्माराम पाटील (वय ५१) यांचा दूर्दैवी मृत्यू झाल्याची घटना घडली आहे. या घटनेमुळे परिसरात हळहळ व्यक्त केली जात आहे. संजय पाटील यांचा मृतदेह १२ डिसेबर रोजी दुपारी साडेचार वाजता अमळनेर ते टाकरखेडा दरम्यान रेल्वे रूळावर छिन्नविछिन्न अवस्थेत सापडला. मृतदेह प्रथम अमळनेर पोलिसांकडे सोपविण्यात आला आणि शवविच्छेदनासाठी ग्रामीण रुग्णालयात ठेवण्यात आला.
पोलिस तपास सुरू असतांना, १४ डिसेंबर रोजी चोपडा शहर पोलिसात मिसिंग गुन्हा दाखल झाल्यानंतर त्याच्या नातेवाईकांनी मृतदेहाची ओळख पटवली. मृतदेहाच्या कपड्यांवरून व चप्पलावरून पोलिस कॉन्स्टेबल संजय पाटील यांचा मृतदेह असल्याचे त्यांच्या पत्नीने ओळखले. यावरून नातेवाईकांनी अमळनेर ग्रामीण रुग्णालयात जाऊन मृतदेहाची खात्री केली, आणि पत्नीने ही मृतदेह त्यांचाच असल्याचे स्पष्ट केले. शवविच्छेदन करून मृतदेह नातेवाईकांच्या ताब्यात देण्यात आला.
या घटनेचे तपास पोलीस हवालदार गणेश पाटील करीत आहेत. संजय पाटील यांच्या निधनामुळे त्यांच्या कुटुंबात शोककळा पसरली असून, संपूर्ण पोलिस विभागात ही घटना दुःखद मानली जात आहे.
