चिंताजनक! जळगावात आणखी एकाचा खून, नातेवाइकांचा काळीज चिरणारा आक्रोश

जळगाव : शहरासह जिल्ह्यात खुनाच्या घटनांमध्ये प्रचंड वाढ झाली आहे. दोन दिवसाआड खुनाच्या घटना समोर येत असून, वाढत्या गुन्हेगारीच्या घटनांमुळे नागरिक चिंतित आहेत. अशात पुन्हा एका तरुणाचा खून करण्यात आल्याची घटना उघडकीस आली आहे. या प्रकरणी पोलिसांनी एका संशयिताला ताब्यात घेतले, अन्य संशयितांचा शोध सुरू आहे.

सागर साहेबराव सोनवणे (वय ३३, अंदाजे) असे मृत तरुणाचे नाव आहे. जळगाव शहरालगत असलेल्या निमखेडी शिवारात सागर साहेबराव सोनवणे या तरुणाचा धारधार शस्त्राने वार करून निर्घृण खून करण्यात आला. ही घटना रविवारी (दि. १४ डिसेंबर २०२५) रात्री उशिरा घडली.

मारेकऱ्यांनी सागरच्या डोक्यात वार करून त्याला जखमी अवस्थेत फेकून दिले होते. घटनेची माहिती मिळताच नातेवाईक व ग्रामस्थांनी सागरला तातडीने जळगाव शासकीय वैद्यकीय महाविद्यालय व रुग्णालयात दाखल केले. डॉक्टरांनी त्याला मयत घोषित केले.

या घटनेनंतर जिल्हा रुग्णालयात नातेवाईकांनी मोठी गर्दी केली होती. या प्रकरणी पोलिसांनी एका संशयिताला ताब्यात घेतले असून, अन्य संशयितांचा शोध सुरू आहे. खुनाचे नेमके कारण अद्याप स्पष्ट झालेले नाही. दरम्यान, नातेवाईकांनी जिल्हा रुग्णालयात काळीज चिरणारा आक्रोश केला होता.

नागरिक चिंतित

जिल्ह्यात खुनाच्या घटनांमध्ये प्रचंड वाढ झाली आहे. दोन दिवसाआड खुनाच्या घटना समोर येत असून, वाढत्या गुन्हेगारीच्या घटनांमुळे नागरिक चिंतित आहेत.