भुसावळ : साकेगाव नजीक हायवेवर पहाटे साडेपाच वाजेच्या सुमारास भरधाव अज्ञात वाहनाने दिलेल्या धडकेत एका हरणाचा जागीच मृत्यू झाला. साकेगाव परिसरातील शिवारात हरणांचे कळप मोठ्या संख्येने असल्याने रात्री त्यांचा वावर मोठ्या प्रमाणात असतो.
हायवे ओलांडताना अपघात
अपघातावेळी हरण हायवे ओलांडत होते. वाहनाच्या जोरदार धडकेमुळे हरणाचा जागीच मृत्यू झाला. आज पहाटे हरणाचा मृतदेह हायवेच्या बाजूला आढळून आल्यानंतर ही घटना उघडकीस आली.
वन विभाग व ग्रामस्थ घटनास्थळी दाखल
घटनेची माहिती मिळताच वन खात्याचे अधिकारी घोगरे, साकेगावचे पोलीस पाटील गणेश भोई, तसेच ग्रामपंचायत सदस्य विलास ठोके घटनास्थळी दाखल झाले. अपघातग्रस्त हरणाचा मृतदेह ताब्यात घेऊन पुढील कारवाईसाठी वन खात्याकडे सोपवण्यात आला.
तक्रार नोंदविण्याचे काम सुरू
या घटनेबाबत अधिकृत तक्रार नोंदविण्याचे काम सुरू असल्याचे शेवटच्या वृत्तानुसार समजते. ग्रामीण भागातील वन्यजीवांसाठी हायवेवरील वाहनांची वाढती गती आणि बेफिकिरी चिंतेचा विषय बनली आहे. हरणांचा वावर असलेल्या भागात वाहनचालकांनी काळजी घेण्याचे आवाहन ग्रामस्थ व वन विभागाकडून करण्यात आले आहे.
