मुंबई : राज्यात आज गुरुवारी शपथविधी सोहळा पार पडत आहे. सोहळ्यात मुख्यमंत्री, उपमुख्यमंत्री यांचा शपथ विधी होणार आहे. या सोहळ्याला राष्ट्रवादीचे शरद पवार (शरद पवार गट) आणि शिवसेनेचे (उबाठा) उद्धव ठाकरे हे उपस्थित राहणार नाहीत.
भारतीय जनता पक्षाचे विधिमंडळ पक्षनेते देवेंद्र फडणवीस हे गुरुवारी सायंकाळी ५.३० वाजता आझाद मैदानावर मुख्यमंत्रीपदाची शपथ घेणार आहेत. सोहळ्याला पंतप्रधान नरेंद्र मोदी यांची प्रमुख उपस्थिती असणार आहे. अजित पवार उपमुख्यमंत्रिपदाची शपथ घेणार आहेत.दरम्यान, या सोहळ्याला उपस्थित राहण्यासाठी विरोधकांनाही निमंत्रणे पाठवण्यात आली आहेत. देवेंद्र फडणवीस यांनी शरद पवारांनाही फोन केला. परंतु, ते दिल्लीत असल्याने कार्यक्रमाला उपस्थित राहू शकणार नाहीत.
देवेंद्र फडणवीस तिसऱ्यांदा राज्याचे मुख्यमंत्री
नागपूरचे आमदार फडणवीस हे तिसऱ्यांदा महाराष्ट्राचे मुख्यमंत्री म्हणून शपथ घेत आहेत. 288 सदस्यांच्या महाराष्ट्र विधानसभेच्या निवडणुकीत भाजपने 132 जागा जिंकून सर्वात मजबूत म्हणून पुढे आल्यानंतर फडणवीस या पदासाठी प्रबळ दावेदार म्हणून उदयास आले. भाजपच्या नेतृत्वाखालील महायुतीने निवडणुकीत एकूण 230 जागा जिंकल्या.
फडणवीस यांनी राज्यपालांना पाठिंब्याचे पत्र सुपूर्द केले
बुधवारी राज्यपाल सीपी राधाकृष्णन यांची देवेंद्र फडणवीस यांच्यासह एकनाथ शिंदे आणि शरद पवार यांनी
भेट घेतली. या औपचारिक भेटीत त्यांनी सरकार स्थापनेचा दावा केला होता. त्यांनी युतीतील घटक पक्षांच्या पाठिंब्याची पत्रे राज्यपालांना सादर केली होती. यानंतर राज्यपालांनी फडणवीस यांना नव्या सरकारचे नेतृत्व स्वीकारण्याचे निमंत्रण दिले होते.
सोहळ्यात 42 हजार लोक सहभागी होणार आहेत
भाजप नेते प्रसाद लाड यांनी शपथविधी सोहळ्याबाबत सांगितले की, हा एक भव्य कार्यक्रम असेल यात सुमारे 42 हजार लोक उपस्थित असतील. ते म्हणाले की, पंतप्रधान नरेंद्र मोदी, अनेक केंद्रीय मंत्री आणि विविध राज्यांचे मुख्यमंत्री आणि उपमुख्यमंत्री या कार्यक्रमाला उपस्थित राहणार आहेत. एका अधिकाऱ्याने सांगितले की, शपथविधी सोहळ्याच्या सुरक्षेसाठी 4 हजारांहून अधिक पोलिस तैनात करण्यात आले आहेत.
