शिरपूर : शिरपूर तालुक्यातील गांजा शेतीवर पोलीस यंत्रणेने पुन्हा धडक कारवाई करीत तब्बल दोन कोटी २० लाख रुपये किमतीचा ११ हजार किलो गांजा जप्त केल्याने गांजा तस्करांच्या गोटात खळबळ उडाली. धुळे स्थानिक गुन्हे शाखेसह शिरपूर तालुका पोलिसांनी संयुक्तरीत्या ही कारवाई केली. संशयित कैलास भावसिंग पावरा (रूपसिंगपाडा आंबा, ता. शिरपूर) याच्याविरुद्ध गुन्हा दाखल करण्यात आला असून, संशयित पसार झाला आहे.
धुळे पोलीस अधीक्षक श्रीकांत धिवरे यांना गांजा शेतीबाबत गोपनीय माहिती मिळाल्यानंतर त्यांनी धुळे गुन्हे शाखेचे वरिष्ठ निरीक्षक श्रीराम पवार व शिरपूर तालुका पोलीस निरीक्षक जयपाल हिरे यांना सूचित केल्यानंतर दोन पथके तयार करण्यात आली. संशयित कैलास पावरा हा कसत असलेल्या शेतजमिनीवर पथकाने छापा टाकत दोन कोटी २० लाख रुपये किमतीचा ११ हजार किलो ओला गांजा जप्त केला. हवालदार पवन गवळी यांच्या फिर्यादीनुसार गुन्हा दाखल करण्यात आला.
हेही वाचा : Android आणि iPhone वापरकर्त्यांसाठी महत्वाची बातमी, जाणून घ्या काय आहे?
यांनी केली कारवाई
ही कारवाई धुळे पोलीस अधीक्षक श्रीकांत धिवरे, अपर पोलीस अधीक्षक किशोर काळे, उपविभागीय पोलीस अधिकारी सुनील गोसावी यांच्या मार्गदर्शनात धुळे गुन्हे शाखेचे वरिष्ठ निरीक्षक श्रीराम पवार, शिरपूर तालुका पोलीस निरीक्षक जयपाल हिरे, साहाय्यक निरीक्षक श्रीकृष्ण पारधी, सुनील वसावे, प्रकाश पाटील, मनोज कचरे, मिलिंद पवार, कैलास जाधव, हवालदार पवन गवळी, हवालदार अनिल चौधरी, हवालदार आरीफ पठाण, मनोज नेरकर, चेतन बोरसे, कमलेश सूर्यवंशी, हर्षल चौधरी, राहुल गिरी आणि चालक सतीश पवार, चालक कॉन्स्टेबल सागर कासार आदींच्या पथकाने केली.
