Eknath Khadse जळगाव : मुख्यमंत्री देवेंद्र फडणवीस आणि उपमुख्यमंत्री एकनाथ शिंदे आणि अजित पवार यांच्यासह मंत्रिमंडळाची शपथ घेतली असली तरी, त्यानंतर मंत्रिमंडळ विस्तार लांबणीवर पडला आहे. यामध्ये विविध पक्षांमध्ये, खासकरून महायुतीतील सदस्यांमध्ये मंत्रिपदांसाठी होणारा वाद मुख्य कारण ठरले आहे. प्रत्येक पक्षाला जास्त मंत्रिपद मिळावे अशी इच्छा आहे आणि यामुळे मंत्रिमंडळाच्या विस्ताराला अडथळा निर्माण झाला आहे. महायुतीच्या रखडलेल्या मंत्रिमंडळ विस्ताराबाबत राष्ट्रवादी शरद पवार गटाचे ज्येष्ठ नेते एकनाथ खडसे यांनी टोला लागवीला आहे. ते गुरुवारी प्रसारमाध्यमांशी बोलत होते.
महाराष्ट्र विधानसभा निवडणुकीत महायुतीला स्पष्ट बहुमत मिळालं आहे, तर महाविकास आघाडीला मोठा फटका बसला आहे. ५ डिसेंबरला देवेंद्र फडणवीस यांनी मुख्यमंत्रीपदाची शपथ घेतली, आणि एकनाथ शिंदे आणि अजित पवार यांनी उपमुख्यमंत्रीपदाची शपथ घेतली. तथापि, राज्याच्या मंत्रिमंडळाचा विस्तार अद्याप रखडला आहे, आणि गृहमंत्रीपदासह इतर महत्त्वाच्या खात्यांवरून महायुतीत रस्सीखेच सुरु असल्याची चर्चा आहे.
या संदर्भात राष्ट्रवादी शरद पवार गटाचे ज्येष्ठ नेते एकनाथ खडसे यांनी महायुतीला डिवचले आहे. खडसे यांनी म्हटले की, राज्यात कायदा-सुव्यवस्था ढासळलेली आहे आणि दिवसाढवळ्या लोकांचे अपहरण करून खून केले जात आहेत. परभणीत मोठा हिंसाचार उसळला आहे. त्यामुळे गृहमंत्रीपदासाठी लवकर निर्णय घेणे आवश्यक असल्याचे त्यांनी सांगितले, जेणेकरून कायदा-सुव्यवस्था अबाधित राहील.
मंत्रिमंडळ विस्ताराबाबत एकनाथ खडसेंचे मत: एकनाथ खडसे यांचं म्हणणं आहे की, महायुतीला स्पष्ट बहुमत मिळून देखील मुख्यमंत्री आणि उपमुख्यमंत्रीपदाच्या शपथविधीसाठी बराच वेळ लागला. तसेच, मंत्रिमंडळ विस्तार लांबणीवर पडला आहे. तिन्ही पक्षांमध्ये एकमेकांबद्दल अविश्वासाची भावना दिसून येत आहे, आणि प्रत्येकाला अधिक मंत्रिपद मिळवण्याची इच्छा आहे. त्यांच्या मते, जास्त आमदार असलेल्या पक्षाला जास्त मंत्रिपद मिळणं हे स्वाभाविक आहे.
पराभव मान्य करणारे खडसे : खडसे यांनी महाराष्ट्र विधानसभा निवडणुकीच्या निकालाबद्दल बोलताना सांगितले की, महाविकास आघाडीला मोठा फटका बसला असला तरी, त्यांनी पराभव मान्य केला आहे. त्यांनी निवडणुकीत महायुतीच्या उमेदवारांनी मोठ्या मताधिक्याने विजय मिळवला, आणि महाविकास आघाडीचे उमेदवार कमी मताधिक्याने निवडून आले, असं सांगितलं. काही महाविकास आघाडीचे उमेदवार आपल्या गावात शून्य मतदानाने निवडून आले, ज्यामुळे संशय व्यक्त होतो, परंतु तरीही पराभव स्वीकारून पुढील वाटचाल सुरू केली आहे.
शरद पवार आणि अजित पवार यांची भेट: अजित पवार यांनी शरद पवार यांची दिल्ली येथे भेट घेतली आणि त्यांना वाढदिवसानिमित्त शुभेच्छा दिल्या. यावर एकनाथ खडसे म्हणाले की, राजकारणात मतभेद असूनही आदर आणि सन्मान ठेवण्याची प्रथा आहे. त्यामुळे अजित पवार, सुनेत्रा पवार आणि प्रफुल्ल पटेल यांनी शरद पवार यांना भेटून त्यांच्या आशीर्वाद घेतले.
