---Advertisement---
जळगाव : मुली संकटात असल्याचे पाहून धाव घेतलेल्या पित्याचा एका मुलीसह दुर्दैवी मृत्यू झाल्याची हृदयद्रावक घटना समोर आली आहे. मौलाना साबीर खान नवाज खान (३६) व आलिया साबीर खान (12) असे मृत बाप-लेकीचे नाव असून, या घटनेमुळे जळगाव शहरात खळबळ उडाली आहे.
जळगाव शहरातील मास्टर कॉलनीच्या अक्सानगर परिसरात आज सकाळी ही घटना घडली. मिळालेल्या माहितीनुसार, मौलाना साबीर खान नवाज खान यांची मोठी भाची मारिया फातेमाबी ही घराच्या गच्चीवर कपडे वाळत होती. या वेळी तिच्या स्पर्श जवळच असलेल्या उच्चदाब विद्युत वाहिनीला झाला.
मारिया हिस विजेचा झटका बसल्याचे पाहून मामे बहीण आलिया हिने तिला वाचवण्याचा प्रयत्न केला असता तिला देखील विजेचा झटका बसला. दोन्ही मुली संकटात असल्याचे पाहून मौलाना साबीर खान यांनी धाव घेतली. मात्र, ते ही विद्युत वाहिनीच्या गर्तेत अडकले.
उच्च दाब विद्युत वाहिनीचा जोरदार झटका बसल्यामुळे मौलाना साबीर खान, मुलगी आलिया यांचा जागीच मृत्यू झाला, तर भाची मारिया फातिमा ही गंभीर जखमी झाली असून, तिच्यावर उपचार सुरु आहेत.
नातेवाईकांचा आरोप
दोघांचे मृतदेह जिल्हा रुग्णालयात आणण्यात आले. या वेळी नातेवाईकांनी गर्दी केली होती. दरम्यान, महावितरणच्या हलगर्जीपणामुळे ही घटना घडली असल्याचा आरोप नातेवाईकांनी केला आहे.
