नवी दिल्ली : देवेंद्र फडणवीस यांनी महाराष्ट्राचे नवे मुख्यमंत्री म्हणून शपथ घेतली आहे. राज्यात महायुतीची सत्ता आली आहे. फडणवीस यांनी महाराष्ट्राची सूत्रे हाती घेताच परदेशी गुंतवणूकदारांनीही डावपेचात बदल केले आहेत. ऑक्टोबर आणि नोव्हेंबरमध्ये विक्री करून पळून गेलेल्या गुंतवणूकदारांनी डिसेंबरच्या पहिल्या चार ट्रेडिंग सत्रांमध्ये एक महिन्याचे अंतर भरून काढल्याचे चित्र दिसत आहे. या नव्या खरेदीमुळे भारतीय शेअर बाजारात नवा उत्साह पाहायला मिळत आहे. सलग पाच सत्रांत सेन्सेक्स आणि निफ्टीने मजबूती नोंदवली.
ऑक्टोबर व नोव्हेंबर महिन्यात 1.1 लाख कोटी रुपयांचे शेअर्स विकल्यानंतर विदेशी संस्थागत गुंतवणूकदार (FII) डिसेंबरमध्ये भारतीय शेअर बाजारात परतताना दिसत आहेत. केवळ डिसेंबरच्या पहिल्या चार दिवसांत FII ने 23,500 कोटी रुपयांपेक्षा जास्त किमतीचे शेअर्स खरेदी केले आहेत. विशेष म्हणजे ही रक्कम त्यांच्या नोव्हेंबरमधील एकूण विक्रीपेक्षा जास्त आहे.
NSDL डेटानुसार, FII ने डिसेंबरच्या सुरुवातीपासून 14,964 कोटी रुपयांची गुंतवणूक केली आहे. यासह NSE च्या तात्पुरत्या डेटावरून असे दिसून आले आहे की, एकट्या 5 डिसेंबर रोजी, FII ने 8,539 कोटी रुपयांचे शेअर्स खरेदी केले आणि एकूण खरेदी 23,503 कोटी रुपयांवर नेली.
आरबीआयकडून मोठ्या अपेक्षा, पण…
तज्ज्ञांचे मत आहे की अलीकडील खरेदीचे मुख्य कारण शेअरच्या किमती घसरल्यानंतरचे आकर्षक मूल्यांकन आहे. यासोबतच रिझर्व्ह बँक ऑफ इंडिया (आरबीआय) लवकरच व्याजदरात कपात करेल अशी अपेक्षा होती. जर व्याजदर कमी झाले तर भारतीय अर्थव्यवस्थेचा विकास दर पुढील 6-8 तिमाहीत आणखी वाढू शकेल, असे तज्ज्ञांचे मत होते. आजच्या धोरणाने रेपो दरात कपात केली नसली तरी रोख राखीव प्रमाण कमी करून बँकांच्या हातात अधिक भांडवल दिले आहे.
याशिवाय सरकारकडून अर्थसंकल्पीय वाटप आणि पायाभूत सुविधांवर वाढलेला खर्च हेही एफआयआयच्या गुंतवणुकीचे प्रमुख कारण आहे. या प्रयत्नांमुळे आर्थिक वर्षाच्या उत्तरार्धात आर्थिक क्रियाकलापांना गती मिळण्याची शक्यता आहे. त्याच वेळी, जागतिक स्तरावर अमेरिकेच्या नवीन धोरणांनी (विशेषतः भारताकडे असलेला कल) गुंतवणूकदारांचे लक्ष वेधून घेतले आहे.
