जळगाव : सर्जना मीडिया सोल्यूशन संचालित दै. जळगाव तरुण भारतच्या संचालकपदी पत्रकार अरविंद देशमुख यांची सर्वानुमते निवड करण्यात आली. संस्थेच्या मुख्य कार्यालयात झालेल्या विशेष बैठकीत हा निर्णय जाहीर करण्यात आला. या वेळी संस्थेचे अध्यक्ष रवींद्र लढ्ढा, सचिव संजय नारखेडे, निवासी संपादक चंद्रशेखर जोशी, तसेच अन्य मान्यवर उपस्थित होते.
पत्रकारितेतील संघर्षमय वाटचाल
अरविंद देशमुख यांनी 2000 ते 2014 या कालावधीत दै. तरुण भारतच्या पहूर वार्ताहर म्हणून कार्यभार सांभाळला. त्यांच्या परखड आणि अभ्यासपूर्ण पत्रकारितेमुळे त्यांनी स्थानिक पातळीवर महत्त्वपूर्ण सामाजिक, राजकीय आणि आर्थिक विषयांवर प्रभावीपणे प्रकाश टाकला. गावखेड्यातील समस्यांना वाचा फोडण्याचे आणि सर्वसामान्य जनतेच्या हितासाठी पत्रकारिता करण्याचे त्यांचे कार्य उल्लेखनीय राहिले आहे.
सहकार व औद्योगिक क्षेत्रातील उल्लेखनीय कार्य
पत्रकारितेबरोबरच अरविंद देशमुख हे सहकार आणि औद्योगिक क्षेत्रातही सक्रिय आहेत. त्यांची नुकतीच जळगाव जिल्हा कृषी औद्योगिक सहकारी संस्थेच्या व्हा. चेअरमन म्हणून निवड झाली आहे. तसेच, जळगाव जिल्हा दूध उत्पादक सहकारी संस्थेचे संचालक म्हणूनही ते महत्त्वाची भूमिका बजावत आहेत.
निवडीनंतर उत्स्फूर्त स्वागत
दै. जळगाव तरुण भारतच्या संचालकपदी निवड झाल्यानंतर अरविंद देशमुख यांचे विविध क्षेत्रातील मान्यवरांनी अभिनंदन केले. पत्रकार, सहकार क्षेत्रातील नेते, राजकीय व सामाजिक कार्यकर्ते, तसेच वाचक वर्गातून त्यांच्यावर शुभेच्छांचा वर्षाव होत आहे.
“संघर्षातून मिळवलेले यश अधिक कडसर असते. पत्रकारिता ही माझी ओळख असून, या नव्या जबाबदारीतून ‘दै. जळगाव तरुण भारत’च्या प्रगतीसाठी पूर्ण ताकदीने काम करेन,” अशी भावना अरविंद देशमुख यांनी यावेळी व्यक्त केली.
