शहरात दिवसेंदिवस कायदा आणि सुव्यवस्थेला गालबोट लावण्याच्या घटना गंभीर वळणावर आहेत.कामाला जाणार्या तरूणाच्या दिशेने भरदिवसा गुरूवारी गोळीबार झाला, तर दुपारी रेकॉर्डवरील गुन्हेगारावर कारवाई करण्यास तांबापुरात पोलीस गेले. त्यांनाच तुम्ही का आले, असा जाब विचारत गुन्हेगाराने पोलिसांना शिवीगाळ करत धक्काबुक्की करत पोबारा केल्याने खळबळ उडाली आहे.
गत काळात शहरात तीन ते चार वेळा गोळीबाराच्या घटना घडल्या आहेत. पोलिसांना धक्काबुक्कीचे प्रकार तर नित्त्याचेच झाले आहेत. असे प्रकार घडत असतानाच आता.
एमआयडीसी पोलीस ठाण्याच्या हद्दीतील रेकॉर्डवरील गुन्हेगार इश्तियाक अली राजीक अली (रा.तांबापुरा) याला समक्ष हजर करण्याची सुचना पोनि जयपाल हिरे यांनी आपल्या सहकार्यांना केल्या होत्या.
त्यानुसार गुन्हेगाराच्या शोधकामी सफौ अतुल वंजारी, हेकॉ अल्ताफ पठाण, पोकॉ राहुल रगडे, पोकॉ विशाल कोळी, चंद्रकांत पाटील तसेच मपोकॉ निलोफर सैय्यद यांचे पथक गुरूवारी दुपारी 1.45 वाजता तांबापुरात इश्तियाकच्या घराजवळ धडकले. तेव्हा वॉन्टेड ईश्तियाक अली घरात होता. पथकाने त्याला ताब्यात घेण्याची कारवाई सुरू केली असता त्याची आई हसीनाराजीक अली हिने आरडाओरड करीत पोलिसांना शिवीगाळ केली.
घटनास्थळी सपोनि अमोल मोरे यांनी घटनास्थळी धाव घेत घटनाक्रम जाणून घेतला.
शासकीय कामात अडथळा आणल्याप्रकरणी हेकॉ अल्ताफ पठाण यांच्या फिर्यादीवरून पोलिसांनी तत्काळ ईश्तियाक याची आई हसीना बी राजीकअली. (रा.तांबापुरा), अनिस हमीद पटेल उर्फ शेख (रा.तांबापुरा) यांना ताब्यात घेतले. तपास पोउपनि रवींद्र गिरासे, हेकॉ सचिन मुंढे हे करीत आहेत.
गुन्हेगार पसार होण्यात बहिणीचा रोल
ईश्तियाकसोबत असलेला रेकार्डवरील गुन्हेगार अनिस पटेल याने तुम्ही कशासाठी येथे आले असे म्हणत पोलिसांना धक्काबुक्की केली. त्याने घरात येण्यासही संशयितास घेऊन जाण्यासही पोलिसांना मज्जाव केला. पोलीस पथकालाच कारवाईपासून रोखण्याच्या या प्रकराने दरारा वर्दीचा की गुंडांचा असा प्रश्न स्थानिक नागरिकांना पडला. ईश्तियाक अलीच्या कुटुंबातील सदस्यांनीही पोलिसांना कारवाईत अडथळा आणला. ईश्तियाक याची बहिण नाजिया हिने ईश्तियाक अली यास पळुन जाण्यास मदत केली. त्यानंतर ईश्तियाक हा पोलिसांना धक्का देत घराबाहेर पळाला.त्याचा पाठलाग केला असता तो तांबापुरातील गल्लीबोळातून पोलिसांना गुंगारा देत पसार झाला.
