Jalgaon News : जळगावमध्ये लिफ्टचं टेस्टिंग सुरू असताना अचानक वायर रोप तुटल्यानं मोठा अपघात झाल्याची घटना समोर आली आहे. या अपघातामध्ये जळगावमधील एका व्यवसायिकाचा मृत्यू झाला असून, एक जण जखमी झाला आहे. जळगाव शहरातील नवी पेठ भागात ही घटना घडली आहे. राजकुमार प्रकाश दर्डा असं या अपघातामध्ये मृत्यू झालेल्या व्यक्तीचं नाव आहे. या प्रकरणी जळगाव शहर पोलीस ठाण्यात अकस्मात मृत्यूची नोंद करण्यात आली आहे.
जळगाव शहरातील नवी पेठ भागात ही धक्कादायक घटना घडली आहे. या घटनेत लिफ्ट टेस्टिंग करतांना अचानक लिफ्ट कोसळल्याने एका व्यावसायिकाचा मृत्यू झाला आहे तर एक जण किरकोळ जखमी झाला आहे. राजकुमार प्रकाश दर्डा वय ४६ वर्ष असं या घटनेत मृत्यू झालेल्या व्यावसायिकाचं नाव आहे. ते प्रकाश सायकल मार्टचे मालक आहेत.
मोहाडी रोड परिसरात राजकुमार दर्डा हे आपल्या कुटुंबियांसह वास्तव्याला होता. सायकलचा व्यावसाय करून ते आपला उदरनिर्वाह करत होते. त्यांचे नवीपेठ येथे तीन मजली इमारतीत लिफ्ट बसविण्याचे काम सुरू होते. लिप्टचे काम पुर्ण झाल्यानंतर लिफ्ट कर्मचारी आणि राजकुमार दर्डा हे ५ फेब्रुवारी रोजी सायंकाळी ६ वाजता लिफ्टचे टेस्टिंग करत होते. त्यावेळी अचानक लिफ्टमधील रोपवायर अचानक तुटल्याने लिप्ट कोसळली. त्यात राजकुमार दर्डा हे गंभीररित्या जखमी झाले. त्यांना तातडीने खासगी रूग्णालयात दाखल केले असता रात्री १२ वाजता त्यांचा उपचारादरम्यान मृत्यू झाला. सोबत असलेला कर्मचारी किरकोळ जखमी झाला आहे. याबाबत जळगाव शहर पोलीस ठाण्यात अकस्मात मृत्यूची नोंद करण्यात आली.
