मेडे मेडे मेडे…..! विमानात तांत्रिक बिघाड झाल्यानंतर आणि अपघातापूर्वी शेवटच्या क्षणी काय घडलं ?

राज्याचे उपमुख्यमंत्री अजित पवार यांच्या विमानाला बारामती विमानतळाजवळ भीषण अपघात झाला. या अपघातात अजित पवार यांच्यासह विमानातील कर्मचारी आणि वैमानिकांसह एकूण पाच जणांचा जागीच मृत्यू झाला. अजित पवार आज सकाळी मुंबईहून बारामतीसाठी चार्टर्ड विमानाने निघाले होते. बारामती विमानतळावर विमान उतरत असताना तांत्रिक बिघाड झाल्याने वैमानिकाचे नियंत्रण सुटले आणि विमान जवळच असलेल्या एका शेतात कोसळले. हा अपघात इतका भीषण होता की विमानाला भीषण आग लागली. यातच अजित पवारांचा दुर्देवी मृत्यू झाला. आता अजित पवारांच्या विमान अपघातापूर्वी काय घडलं याची माहिती समोर आली आहे.

विमानात बिघाड झाल्यानंतर काय घडलं ?

मुख्यमंत्री अजित पवार यांनी मुंबई विमानतळावरून सकाळी विमानाने उड्डाण केले होते. सर्व काही सुरळीत सुरू होते. अजित पवारांच्या विमानाने बारामती विमानतळाच्या एअरस्पेसमध्ये प्रवेश करताच विमानातील तांत्रिक यंत्रणा कोलमडली. विमानात बिघाड झाल्याचे लक्षात येताच मुख्य वैमानिक कॅप्टन सुमित कपूर यांनी प्रसंगावधान राखले. त्यांनी विमानावर नियंत्रण मिळवण्याचा आतोनात प्रयत्न केला. विशेष म्हणजे विमानाचे लोकेशन ट्रॅक करणाऱ्या रडारवरही हे विमान अगदी सुस्थितीत असल्याचे दिसत आहे. त्यावेळी पायलटने बारामती विमानतळावर विमानाचे लँडिग करण्याचा प्रयत्न केला. मात्र तांत्रिक अडचण निर्माण झाल्याने त्याने पुन्हा वळसा घातला. यानंतर ते विमान पुन्हा फिरवून पायलटने परत विमान उतरवण्याचा प्रयत्न केला, पण तो अयशस्वी ठरला. त्यानंतर दुसऱ्यांदा विमान धावपट्टीवर आणण्याचा प्रयत्न करत असतानाच विमानाचे नियंत्रण पूर्णपणे सुटले. त्यानंतर ते जमिनीवर कोसळले. आणि अपघात हा घडून आला.

विमान कोसळण्यापूर्वी कॅप्टन सुमित कपूर यांनी एअर ट्रॅफिक कंट्रोलला (ATC) मेडे मेडे (Mayday) असं म्हणत सिग्नल दिला होता. त्यावेळी त्याने काहीतरी तांत्रिक अडचण झाल्याचे सांगितले होते. हा सिग्नल म्हणजे वैमानिकाने मदतीसाठी मारलेली शेवटची हाक असते. हा शब्द फ्रेंच भाषेतील आहे. याचा अर्थ या आणि मला मदत करा असा होतो. जेव्हा विमानाचे इंजिन निकामी होते, विमानात आग लागते किंवा विमान क्रॅश होण्याची भीती असते, तेव्हा वैमानिक रेडिओवर तीन वेळा “मेडे, मेडे, मेडे” असा संदेश देतो.

विमान उतरवण्याची परवानगी देण्यात आली, पण…

मेडे कॉल मिळताच, एटीसी इतर सर्व विमानांचे संपर्क थांबवून केवळ संकटात असलेल्या विमानाला प्राधान्य देते. विमानतळावरील धावपट्टीवर अग्निशमन दल आणि रुग्णवाहिका तैनात केल्या जातात. विशेष म्हणजे ज्यावेळी मेडे कॉल देण्यात आला तेव्हा बारामतीमध्ये धावपट्टी मोकळी होती. त्यामुळे विमान उतरवण्याची परवानगी देण्यात आली होती. पण एटीसीने परवानगी देऊनही विमानातील बिघाड इतका मोठा होता की पायलटला सुरक्षित लँडिंग करता आले नाही. या दुर्घटनेचे गांभीर्य लक्षात घेता AAIB (Aircraft Accident Investigation Bureau) ने तातडीने चौकशीचे आदेश दिले आहेत. तसेच विमानाचा ‘ब्लॅक बॉक्स’ सापडल्यानंतर तांत्रिक बिघाडाचे नेमके स्वरूप स्पष्ट होणार आहे.