Nashik News : महाराष्ट्रात विधानसभेच्या निकालानंतर राजकारणातील चित्र वेगाने बदलू लागले आहे. सत्ताधारी महायुती आपली सत्ता कायम टिकवण्यात यशस्वी ठरली, तर दुसऱ्याबाजूला महाविकास आघाडी कमकुवत होत आहे. काँग्रेस, राष्ट्रवादी (शरद पवार गट) आणि शिवसेना (उबाठा) गटातून मोठ्या प्रमाणात आऊटगोईंग सुरु आहे. या सर्व पदाधिकारी, कार्यकर्त्यांचा सर्वात जास्त ओघ हा भाजप आणि शिवसेनेकडे आहे. त्यात उद्धव ठाकरे गटाला सर्वात जास्त गळती लागली आहे. एकनाथ शिंदे यांच्या नेतृत्वात शिवसेनेने ५७ आमदार निवडून आले तर उद्धव ठाकरे गटाचे फक्त २० आमदार निवडून आले. सत्तेचा आणि राजकीय भविष्याचा विचार करुन ठाकरे गटातून बाहेर पडणारे नेते, पदाधिकारी, कार्यकर्ते एकनाथ शिंदे यांच्या नेतृत्वावर जास्त विश्वास दाखवत आहेत.
आज कोकणातील राजापूर विधानसभा मतदारसंघातील माजी आमदार राजन साळवी एकनाथ शिंदे यांच्या नेतृत्वाखाली शिवसेनेत प्रवेश करणार आहेत. यामुळे उद्धव ठाकरे गटाला मोठा धक्काच बसला आहे. कारण राजन साळवी हे कोकणातील मोठे नेते असून मागच्या अनेक निवडणुकीत त्यांनी राजापूर विधानसभेचा गड राखला होता. मात्र २०२४ च्या विधानसभा निवडणुकीत शिवसेना उमेदवार किरण सामंत यांनी राजन साळवींचा पराभव केला. किरण सामंत हे उदय सामंत यांचे बंधु आहेत. राजन साळवी यांच्या जाण्याने कोकणात ठाकरे गट आणखी कमकुवत होईल.
हेही वाचा :घरात लहान भावाचा तिलक समारंभ सुरू अन् मोठ्या भावाने घेतला गळफास; कारण ऐकून सर्वच थक्क
राज ठाकरे आणि एकनाथ शिंदेंचेही चांगले संबंध
शिवसेना (उबाठा) गटातून मोठ्या संख्येने पदाधिकारी, कार्यकर्ते प्रवेश करत असताना, एकनाथ शिंदे यांच्या नेतृत्वाखाली शिवसेनेने आता नाशिकमध्ये महाराष्ट्र नवनिर्माण सेनेलाही मोठा धक्का दिला आहे. नाशिक हा काही वर्षांपूर्वी मनसेचा गड मानला जात होता. राज ठाकरे आणि एकनाथ शिंदे यांचे चांगले संबंध आहेत. लोकसभा निवडणुकीत मनसेने महायुतीला बिनशर्त पाठिंबा दिला होता. मात्र आता नाशिकमध्येही मनसेच्या एका माजी नगरसेवकाला शिवसेनेत प्रवेश देण्यात आला आहे.
कोणी केला प्रवेश?
महाराष्ट्र नवनिर्माण सेनेचे सातपूर प्रभाग समितीचे माजी सभापती तथा माजी नगरसेवक योगेश शेवरे, उद्धव ठाकरे गटातील तथा नाशिकरोड जेलरोड परिसरातील माजी नगरसेवक पवन पवार आणि काँग्रेस महिला आघाडीच्या नाशिक जिल्ह्याध्यक्षा वंदना पाटील यांनी एकनाथ शिंदे यांच्या नेतृत्वाखाली शिवसेनेत जाहीर प्रवेश केला आहे. एकनाथ शिंदे यांच्या ठाणे येथील निवासस्थानी आणि त्यांच्या प्रमुख उपस्थितीत हा प्रवेश पार पडला. यावेळी, शिवसेना उपनेते तथा नाशिक जिल्हा संपर्क प्रमुख विजय करंजकर, सहसंपर्क प्रमुख राजू लवटे, महानगर प्रमुख प्रविण तिदमे, विक्रम नागरे, अभय महादास आणि शिवसेना पदाधिकारी उपस्थित होते.
