रघुजी राजे भोसले यांची तलवार १५ ऑगस्टपूर्वी येणार,मंत्री. आशिष शेलार यांची माहिती

शूर मराठा सरदार नागपूरकर रघुजी राजे भोसले यांची ऐतिहासिक तलवार जुलैच्या शेवटच्या आठवड्यात अथवा १५ ऑगस्टच्या आधी लंडनहून महाराष्ट्रात परत आणू, अशी माहिती राज्याचे सांस्कृतिक कार्य मंत्री ॲड. आशिष शेलार यांनी आज विधिमंडळाच्या दोन्ही सभागृहात दिली.

विधानसभा सभागृहामध्ये महाराष्ट्र विधानसभा नियम २९३ नुसार विधानसभेमध्ये सत्ताधारी पक्षाने जी चर्चा उपस्थित केली होती तसेच विधान परिषदेत मांडण्यात आलेल्या ठरावाला उत्तर देताना ते बोलत होते. सांस्कृतिक कार्य विभाग मंत्री शेलार यांनी सांगितले की, नागपूरच्या भोसले घराण्यातील शूर मराठा सरदार राजे रघुजी भोसले यांची तलवार ही लिलावात निघाली होती.

त्याला भारतामध्ये आणि आपल्या महाराष्ट्र सरकारची मालमत्ता समजून ती पुन्हा आणण्यासाठी एक चांगला प्रयोग, चांगला प्रयत्न हा महाराष्ट्र सरकारच्या सांस्कृतिक कार्य विभागाच्या माध्यमातून सफल झाला. या तलवारीवर रघुजी भोसले यांचं नाव कोरलेले असून तलवारीची वज्रमूठ सोन्याची आहे.

युद्धामध्ये वापरली गेलेली तलवार कदाचित त्यावेळेला ईस्ट इंडिया कंपनीच्या माध्यमातून महाराष्ट्रातून परदेशात गेली. तलवार लिलावात निघाल्यावर महाराष्ट्र शासनाने बोली लावली. जवळ जवळ ६९ लाख ९४ हजार ४३७ करासहित ही तलवार आपल्या ताब्यात घेण्याची प्रक्रिया पूर्ण केली. त्या व्यवस्थेबरोबर करारनामा आपला बदली झाला. त्यासाठीच्या खर्चास २१ मे २०२५ रोजी मान्यता दिली.

मराठी माणसाच्या कर्तबगारीवर प्रश्नचिन्ह उपस्थित करु नका

अटकेपार झेंडा गाडणाऱ्या मराठी माणूस आणि महाराष्ट्राच्या कर्तबगारीवर प्रश्नचिन्ह उपस्थित करु नका, असा सज्जड दम राज्याचे सांस्कृतिक मंत्री ॲड. आशिष शेलार यांनी नामोल्लेख टाळत खासदार निशिकांत दुबेंना दिला.

तलवार मराठी माणसाच्या पराक्रमाची साक्षीदार

आता कस्टम क्लिअरन्स, पॅकिंग, हाताळणीसाठी स्टार वर्ल्ड वाईड ग्रुप प्रा. लि. या कंपनीची नियुक्ती करून १५ ऑगस्टच्या आधी जुलै महिन्यातच आपल्या मराठ्यांच्या, मराठी माणसाच्या, महाराष्ट्राच्या पराक्रमाची साक्ष असलेली ही तलवार आपण सन्मानपूर्वक महाराष्ट्रात या भूमीमध्ये परत आणू आणि ती सगळ्यांना दाखवण्याचा प्रयत्न करणार आहोत, असेही मंत्री शेलार यांनी सभागृहासमोर सांगितले.