जळगाव : येथील शारदा एज्युकेशन फाउंडेशन व श्री संत जगनाडे महाराज बहुद्देशीय संस्थेतर्फे रविवारी दि. २९ डिसेंबर रोजी सकाळी तेली समाजाचा राज्यस्तरीय वधू-वर व पालक परिचय मेळावा मोठ्या उत्साहात पार पडला. या मेळाव्यात ७ विवाह जुळले असून १ आदर्श विवाह या ठिकाणी पार पडला. तसेच मेळाव्यात १४०० हून अधिक विवाहेच्छुक वधू – वर यांनी नोंदणी करून परिचय करून दिला.
शांताराम नारायण चौधरी नगर, खान्देश सेंट्रल मॉल परिसरात आयोजित मेळाव्यामध्ये हजारोंच्या संख्येने समाजबांधव उपस्थित होते. यावेळी मान्यवरांचा सत्कार करण्यात आला. याप्रसंगी तेली समाजातील वधू-वर तसेच पालकांनी आपल्या पाल्यांच्या परिचय करून दिला. परिचय करून देणाऱ्या वधुना आयोजकांच्या वतीने श्री संत जगनाडे महाराज यांची प्रतिमा भेट देण्यात आली.
यांची होती उपस्थिती
व्यासपीठावर प्रमुख पाहुणे म्हणून पाणी पुरवठा मंत्री गुलाबराव पाटील, आ. राजूमामा तथा सुरेश भोळे यांच्यासह उद्योजक नंदू चौधरी, विनोद चौधरी, विजय चौधरी, धरणगावचे माजी नगराध्यक्ष संतोष चौधरी, सुरेश चौधरी, रामचंद्र चौधरी, निर्मला चौधरी, बबन चौधरी, शिवसेना महानगर प्रमुख शरद तायडे, दिंगबर चौधरी, शिवलाल चौधरी, माजी नगरसेवक दिंगबर चौधरी, ऍड. महेंद्र चौधरी, भास्कर चौधरी, मणिलाल चौधरी यांच्यासह समाजातील विविध क्षेत्रात कार्यरत असलेले पदाधिकारी उपस्थित होते.
मान्यवरांनी व्यक्त केले मनोगत
तसेच पांडुरंग चौधरी, तेली समाज जिल्हाध्यक्ष सुरेश चौधरी, नंदू चौधरी, विजय चौधरी, अशोक चौधरी, निर्मला चौधरी, शोभा चौधरी, बेबाबाई सुरळकर आदी मान्यवरांनी यावेळी मनोगत व्यक्त केले. माजी पंतप्रधान मनमोहनसिंग आणि स्व.सदानंद चौधरी यांना दोन मिनिटे मौन पाळून श्रद्धांजली अर्पण करण्यात आली.
‘ब्रह्मगाठी’ वधू-वर परिचय पुस्तिकेचे प्रकाशन
प्रारंभी श्री संत जगनाडे महाराज यांच्या मूर्तीस मान्यवरांच्या हस्ते माल्यार्पण करून दीपप्रज्वलन करण्यात आले. त्यानंतर मान्यवरांच्या हस्ते ‘ब्रह्मगाठी’ या वधू-वर परिचय पुस्तिकेचे प्रकाशन करण्यात आले. ही पुस्तिका संपूर्ण राज्यात व देशातील काही भागातदेखील वितरित होत असते. मेळाव्याला गुजरात, राजस्थान, मध्यप्रदेश यासह महाराष्ट्रातील विविध जिल्ह्यांमधून समाजबांधव मोठ्या संख्येने उपस्थित होते.
पार पडला आदर्श विवाह
मेळाव्याच्या माध्यमातून जुळलेला एक आदर्श विवाह या ठिकाणी पार पडला. नव वर-वधूला मान्यवर शुभ आशीर्वाद दिला. धरणगाव येथील नगरसेविका लक्ष्मीबाई भगवान चौधरी यांचे नातू, माजी नगराध्यक्ष प्रतिभा संजय चौधरी यांचा भाचा, आशाबाई आणि गणेश चौधरी यांचे ज्येष्ठ चिरंजीव रुपेश यांचा नशिराबाद येथील वसंत गायकवाड यांची नातं, दिवंगत संजय गायकवाड यांची कन्या विद्या हिच्याशी मान्यवरांच्या उपस्थित पार पडला.
असे आदर्श विवाह अन्य समाजातही व्हावे : मंत्री गुलाबराव पाटील
समाजात पैसे खर्च करून मोठा विवाह करण्याची एक प्रथा पडली आहे. या प्रथेला तडा देत या नव वर-वधुनी समाजात एक नवीन ओळख निर्माण केली आहे. असा आदर्श विवाह इतर समाजातही व्हावे, असे आवाहन मंत्री गुलाबराव पाटील यांनी केले. तसेच त्यांनी नव वर-वधु यांना पुढील आयुष्याच्या शुभेच्छा दिल्या.
समाजापासून कधीही दूर जाऊ नका : आमदार सुरेश भोळे
प्रत्येक समाजाने काळानुसार बदल करून सामाजिक विवाह सोहळ्यात सहभागासाठी होण्यासाठी पुढे यायला पाहिजे. पतंगाप्रमाणे आयुष्यात तुम्ही कितीही वर जा, मात्र ज्या समाजाने आपल्याला घडविले, मोठे केले, ओळख दिली. त्या समाजापासून कशीही दूर जाऊ नका, असे आमदार सुरेश भोळे यांनी यावेळी सांगितले.
प्रास्ताविक संस्थेचे अध्यक्ष प्रशांत सुरळकर यांनी केले. तर आभार प्रदर्शन विशाल पाटील यांनी केले. सूत्रसंचालन संचालिका सरिता खाचणे यांनी केले. यशस्वीतेसाठी संस्थेचे अध्यक्ष प्रशांत सुरळकर, उपाध्यक्ष बबन चौधरी, विशाल पाटील, सचिव रामचंद्र चौधरी, संदीप चौधरी, अमोल चौधरी, योगराज चौधरी, डॉ. दीपक चौधरी आदींनी परिश्रम घेतले.
