दुकानाचे कुलूप तोडून चोरी करणाऱ्या दोघांना अवघ्या चार तासांत अटक

धुळे : शहरात चोऱ्यांच्या घटनांमध्ये वाढ झाली. अशातच आझाद नगर भागातील कापडाच्या दुकानात अज्ञात चोरट्यांनी चोरी केली होती. या चोरी प्रकरणी आझाद नगर पोलीस स्टेशनच्या शोध पथकाने अवघ्या चार तासांत दोघांना अटक केली. त्यांच्याकडून चोरीस गेलेला मुद्देमाल व मोटारसायकल जप्त करण्यात आली आहे.

आझाद नगर परिसरात नयन विनोद थोरात यांचे कापड दुकान आहे. या दुकानाचे अज्ञात चोरट्यांनी कुलूप तोडून अज्ञात चोरट्यांनी चोरी केली होती. नयन थोरात यांनी आझादनगर पोलीस स्टेशन त्यांच्या फिर्यादीवरून दिली.

त्यांच्या फिर्यादीवरुन गुन्हा दाखल करण्यात आला. या गुन्ह्याच्या तपासासाठी पोलीस अधीक्षक श्रीकांत धिवरे व उपविभागीय पोलीस अधिकारी राजकुमार उपासे यांच्या मार्गदर्शनाखाली निरीक्षक निवृत्ती पवार यांनी शोध पथक रवाना केले.

पोलीस कर्मचारी गौतम सपकाळे, शांतीलाल सोनवणे, योगेश शिरसाठ, संदीप कढरे, रफीक पठाण, मनोज बागुल, योगेश शिंदे, अनिल शिंपी, पंकज जोंधळे, मक्सूद पठाण यांच्या पथकात यांचा समावेश होता. या पथकाने आझाद नगर परिसरात गुप्त माहितीदारांच्या मदतीने तपास सुरू केला. या तपासात शाहरुख शेख शब्बीर मेहतर व कय्युम शेख मोहम्मद या दोघांनीच चोरी केल्याची कबुली दिली. निळा चौकाकडे जाणाऱ्या रस्त्यावर एमएच-१८ बीएस-९६०६ या मोटारसायकलसह थांबले असताना पोलिसांनी तत्काळ कारवाई करत दोघांनाही ताब्यात घेत त्यांच्याकडून चोरीस गेलेला मुद्देमाल जप्त केला.