फोंडा (गोवा) : उद्या शनिवार (१७ मे) पासून गोवा येथे ‘सनातन राष्ट्र शंखनाद महोत्सवा’च्या जनजागृतीसाठी आज शुक्रवारी (१६ मे) ऐतिहासिक आणि भव्य वाहनफेरी काढण्यात आली. ही वाहनफेरी फोंडा येथील सनातन आश्रमापासून फर्मागुडीपर्यंत निघाली. यासोबतच देशाच्या कानाकोपर्‍यातून महोत्सवासाठी येणारी शेकडो वाहने पत्रादेवी, काणकोण आदी सीमारेषांद्वारे गोव्यात प्रवेश केला. त्यांनी देखील या वाहन फेरीत सहभाग घेतला.या फेरीत दुचाकी, चारचाकी आणि बस गाड्यांवर भगवे ध्वज दिमाखात फडकत होता. यावेळी ‘हर हर महादेव’, ‘सनातन धर्माचा विजय असो’, ‘जयतु जयतु हिंदुराष्ट्रम्’ अशा घोषणांनी परिसर दुमदुमून गेला होता. याप्रसंगी गोवा भगवेमय झाल्याचे दिसून आले. या घोषणांनी सर्वत्र चैतन्य निर्माण झाले. ‘सनातन राष्ट्राचा शंखनाद’! ही फेरी म्हणजे सनातन संस्कृतीच्या पुनरुज्जीवनासाठी हिंदु राष्ट्राच्या दिशेने उचलेले एक मोठे पाऊल ठरले आहे.
सनातन संस्थेच्या फोंडा येथील सनातन आश्रमाजवळ माजी भारतीय प्रशासकीय सेवा अधिकारी आयएएस अरुण देसाई यांच्या हस्ते प्रथम धर्मध्वजाचे पूजन करण्यात आले. यानंतर वाहनफेरीला प्रारंभ झाला. ही वाहनफेरी पुढे कवळे -तिस्क फोंडा, शांतीनगर जंक्शन, गोवा बागायतदार, फोंडा पोस्ट ऑफीस कार्यलय-फोंडा येथील जुने बसस्थानक-श्री हनुमान मंदिर, कुर्टी-फर्मागुडी येथील किल्ल्याजवळ सांगता झाली. यापूर्वी विविध ठिकाणी सुहासिनींनी धर्मध्वजाची ओवाळणी करून आणि रस्त्यावर रांगोळी घालून फेरीचे स्वागत केले. या वाहन फेरीत विविध संघटना सहभागी झाल्या होत्या.
वाहनफेरी म्हणजे भक्तीची दिव्य वारी ! अभय वर्तक
वाहन फेरीच्या प्रारंभी सनातन संस्थेचे प्रवक्ता श्री. अभय वर्तक म्हणाले, ‘‘ज्याप्रकारे आषाढी वारीसाठी लाखो वारकरी विठ्ठलाच्या भेटीच्या ओढीने पंढरपूरकडे प्रयाण करतात. त्याचप्रकारे सनातन धर्मासाठी विश्वव्यापक कार्य करणारे सनातन संस्थेचे संस्थापक सच्चिदानंद परब्रह्म डॉ. जयंत बाळाजी आठवले यांच्या ८३ व्या जन्मोत्सवासाठी देशविदेशातून हजारो साधक आणि धर्मप्रेमी हिंदू विविध मार्गाने आज गोव्यातील पंढरीत प्रवेश केला. ही केवळ वाहन फेरी नसून श्रीगुरुदेवांप्रती असलेल्या भक्तीची दिव्य वारी आहे.
