जळगाव : शहरासह जिल्ह्यात दुचाकी चोरीच्या घटनांमध्ये दिवसागणिक वाढ होत आहे. या गुन्ह्यांच्या शोधकामी जिल्हापेठ आणि जळगाव शहर या पोलीस ठाण्यांतील गोपनीय शाखेच्या कर्मचाऱ्यांनी सूक्ष्म तपास केला. या कारवाईत चोरीस गेलेल्या तब्बल ३९ दुचाकी हस्तगत केल्या. याप्रकरणी सात जणांना अटक केली.
शहर पोलिसांच्या कारवाईत १९ दुचाकी हाती
जिल्हापेठ तसेच शहर पोलीस ठाण्याच्या हद्दीत अनेक दुचाकींची चोरी झाली होती. याप्रकरणी दोन्ही पोलीस ठाण्यात अनेक गुन्हे दाखल झाले. या गुन्ह्यातील संशयित चित्रा चौकात चोरीची दुचाकी घेऊन फिरत असल्याची गोपनीय माहिती शहर पोलीस ठाण्याच्या कर्मचाऱ्यांना मिळाली. संशयित आसिफ बशीर पटेल (वय ३५, रा. दहिगाव, ता. यावल) याला चोरीच्या दुचाकीसह चित्रा चौकातून अटक केली. त्याची कसून चौकशी केली असता, त्याने दुचाकी चोरी केल्याची कबुली दिली. संशयितांनी जळगाव शहर पोलीस ठाणे आणि जिल्हा बीड पोलीस ठाण्यांतर्गत चोरी केल्याचे तपासातून निष्पन्न झाले आहे.
यांनी केली कारवाई
शहर पोलीस ठाण्याचे निरीक्षक अनिल भावरी यांच्या मार्गदर्शनात साहाय्यक निरीक्षक रामचंद्र शिकारे, उपनिरीक्षक राजीव जाधव, साहाय्यक फौजदार सुनील पाटील, सतीश पाटील, भास्कर ठाकरे, योगेश पाटील, किशोर निकुंभ, अमोल ठाकूर, संतोष खवले, उमेश भंडारकर, पांचाळ, प्रणय पवार यांच्यासह इतरांनी ही कारवाई केली.
जिल्हापेठ पोलिसांच्या हाती लागल्या २० दुचाकी
जिल्हापेठ पोलीस ठाण्याचे निरीक्षक राकेश मानगावकर यांच्या पथकाने गुप्त माहितीवरून राजेंद्र ज्ञानेश्वर महाजन (रा. धानोरा) याला ताब्यात घेतले. त्यानंतर पोलिसांनी गणेश सुभाष पाथरवट, अविनाश सुनील पाथरवट (दोन्ही रा. वाघळूद), शाहरुख रमतुल्ला खाटीक (रा. लक्ष्मीनगर, जळगाव), सुरेश उत्तम मोरे (रा. वाघळूद) यांच्यासह विधिसंघर्षग्रस्त बालकाला ताब्यात घेतले. सर्वांची चौकशी करता, त्यांनी आतापर्यंत २० दुचाकी चोरी केल्याची कबुली दिली. पोलिसांनी अद्याप १८ दुचाकी हस्तगत केल्या असून, दोन रावेर येथे आहेत.
यांनी केली कारवाई
पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी संदीप गावित यांच्या मार्गदर्शनात जिल्हापेठचे पोलीस निरीक्षक राकेश मानगावकर यांच्या पथकातील साहाय्यक निरीक्षक संतोष चव्हाण, महिला हवालदार भारती देशमुख, राजेश पदमर, मिलिंद सोनवणे, राहुल पाटील, अमितकुमार मराठे, प्रशांत सैंदाणे, नरेंद्र दिवेकर, प्रवीण जाधव, विकास पहरकर यांनी ही कामगिरी बजावली.
