---Advertisement---
जळगाव : चढावर जाणाऱ्या सिमेंटच्या गोण्या भरलेल्या ट्रॅक्टरवरील चालकाचा ताबा सुटल्याने तो तो पलटी झाला. यात ट्रॅक्टर चालक ट्रॅक्टरखाली दाबल्या गेल्याने त्याचा जागीच मृत्यू ओढवला. हा अपघात शुक्रवारी (12 सप्टेंबर) सकाळी 11 वाजता अनुराग स्टेट बँक कॉलनी परिसरात घडली. मृत चालकाचे नाव गणेश मोरसिंग चव्हाण (वय 47, रा. भैरव नगर, पिंप्राळा हुडको, जळगाव) असे आहे.
गणेश चव्हाण हे ट्रॅक्टर चालवून परिवाराचा उदरनिर्वाह करत होते. शुक्रवारी (12 सप्टेंबर) सकाळी त्यांनी रेल्वे मालधक्क्यावरून ट्रॅक्टर (क्र. एमपी-68 ए 0646) सिमेंटच्या गोण्या भरल्या होत्या. सकाळी 11 वाजताच्या सुमारास ते अनुराग कॉलनीतील तीव्र चढावावरून जात होते. यावेळी त्यांचा ट्रॅक्टरवरील ताबा सुटला आणि ट्रॅक्टर पलटी झाले. यात गणेश हे ट्रॅक्टरखाली दबले जाऊन गंभीर जखमी झाले आणि घटनास्थळीच त्यांचा मृत्यू झाला.
अपघाताची माहिती मिळताच रामानंद नगर पोलीस ठाण्याचे कर्मचारी कॉन्स्टेबल योगेश माळी, संदीप सोनवणे, चंद्रकांत पाटील आणि झुलालसिंग परदेशी यांनी घटनास्थळी धाव घेतली. स्थानिकांच्या मदतीने ट्रॅक्टर बाजूला करून चव्हाण यांना बाहेर काढण्यात आले. तत्काळ शासकीय वैद्यकीय महाविद्यालयात दाखल केले असता, तपासणीनंतर वैद्यकीय अधिकाऱ्यांनी त्यांना मृत घोषित केले आहे. घटनेनंतर मृताच्या नातेवाईकांनी रुग्णालयात गर्दी केली. याप्रकरणी रामानंद नगर पोलीस ठाण्यात अकस्मात मृत्यूची नोंद करण्यात आली असून, पुढील तपास सुरू आहे.
