---Advertisement---
Mamurabad Call Center Case : जळगाव : प्रसिद्ध कंपन्यांचे एजंट असल्याचे भासवून परदेशी नागरिकांना लाखोंचा गंडा घालणान्या एका आंतरराष्ट्रीय बनावट कॉल सेंटरचा जळगाव पोलिसांनी पर्दाफाश केला. ममुराबाद रस्त्याला असलेल्या फार्महाऊसवर बसून परदेशी नागरिकांची ऑनलाइन फसवणूक करून त्यांच्या खात्यातील पैशांतून सुरुवातीला क्रिप्टोकरन्सी खरेदी करायची, त्यानंतर त्याचे रूपांतर करून ती हवालामार्गे भारतात आणली जायची, अशा पद्धतीने हे रॅकेट सुरू असल्याची माहिती तपासात समोर आली आहे.
दरम्यान, हे संपूर्ण प्रकरण केवळ भारतापुरते मर्यादित नसून, हे प्रकरण आंतराष्ट्रीय स्तरावरचे असून, या कारवाईबाबत दिल्लीहूनच सूचना आल्याचे माहिती सूत्रांकडून मिळाली आहे. काही दिवसांपूर्वी इगतपुरी व नाशिक जिल्ह्यांतील काही ठिकाणी अशाच प्रकारचे बनावट कॉलसेंटरवर कारवाई सीबीआयच्या पथकाकडून करण्यात आली होती.
दरम्यान, न्यायाधीश एम.एम. निकम यांच्या न्यायालयात पोलीस बंदोबस्तात संशयित आरोपी ललित कोल्हे यांच्यासह इतर सहा आरोपींना सोमवारी हजर करण्यात आले. यावेळी बचावपक्षाकडून अॅड. सागर चित्रे, अकील ईस्माईल, मुकेश शिंपी यांनी काम पाहिले तर सरकार पक्षाकडून अॅड. वळवी यांनी काम पाहिले. बनावट कॉलसेंटर प्रकरणी पोलिसांनी प्राथमिक तपासात संबधित संशयितांवर वेगवेगळी १३ कलमे लावण्यात आली आहेत.
त्यात संघटीत गुन्हेगारीचे कलम (बीएनएस २०२३, कलम १११) पोलिसांनी लावले आहे. या कलमावर बचावपक्षाच्या वकिलांनी जोरदार आक्षेप घेतला, त्यावर ललित कोल्हे यांच्यावर यापूर्वी अनेक गुन्हे दाखल असल्याने त्यांच्यावर संघटीत गुन्हेगारीचे कलम लावल्याचा दावा तपास अधिकाऱ्यांसह सरकारी पक्षाच्या वकिलांनी केला.
अमेरिका व कॅनडामधून पैसा भारतात
अमेझॉनच्या गाहकांचा डेटा घेऊन कॉल केले जात होते. अमेरिका, कॅनडामधून फसवणूक केल्यानंतर अॅमेझॉन आयडी कोणत्या बँकेशी लिंक आहे, हे समजत होते. त्यानंतर याच रॅकेटमधील काही सायबर गुन्हेगार तो पैसा क्रिप्टोकरन्सीद्वारे खरेदी करत होते. त्यानंतर हा पैसा मुंबई येथे हवालाद्वारे येत होता, अशी माहिती तपासात समोर आली आहे. फिर्यादीत देखील याबाबतचा उल्लेख आहे.
आगारिया ब्रदर्स करायचे फार्म हाऊसवर रेकीचे काम
जळगावातील संपूर्ण काम सकेश आगारिया आणि त्याचा भाऊ नरेंद्र आगारिया यांच्याकडे होते. ते ममुराबाद फार्महाऊसचे रेकीचे काम करीत होते. तर, कॉलसेंटरमधील काम करणाऱ्यांकडून ऑनलाइन फसवणुकीच्या कामावर लक्ष दिले जात होते. हे आगारिया ब्रदर्स ललित कोल्हे यांचे निकटवर्तीय मानले जातात.
---Advertisement---
