---Advertisement---
जळगाव : कुरिअर कर्मचारी पत्नीसोबत घरात जेवायला बसले असताना, ८ ते १० अज्ञात हल्लेखोरांनी त्यांच्या घरावर गोळीबार आणि दगडफेक केली. ही घटना कुसुंबा येथील गणपती नगरात शनिवारी रात्रीच्या सुमारास घडली. यात घराचे आणि दुचाकीचे मोठे नुकसान झाले असून, हल्ल्यामागील कारण अद्याप अस्पष्ट आहे. दरम्यान, या प्रकरणी पाच संशयितांना अटक करण्यात आसल्याची माहिती पोलीस सूत्रांनी दिली आहे.
पोलीस सूत्रानुसार, कुरिअर कर्मचारी चंद्रशेखर पाटील हे पत्नीसोबत घरात जेवण करत असताना हा हल्ला झाला. त्यांचा एक मुलगा कामावर, तर दुसरा बाहेरगावी गेला होता. रात्री साडेदहाच्या सुमारास अचानक काही दुचाकी त्यांच्या घरासमोर थांबल्या. त्यावरून उतरलेल्या ८ ते १० हल्लेखोरांनी प्रथम शिवीगाळ करण्यास सुरुवात केली. काही कळायच्या आतच त्यांनी घराच्या दिशेने जोरदार दगडफेक सुरू केली, ज्यामुळे खिडक्यांच्या काचा फुटल्या. त्यानंतर, घराबाहेर लावलेली पाटील यांची दुचाकीही फोडली.
यावरच न थांबता, हल्लेखोरांपैकी काहींनी आपल्याजवळील शस्त्राने घराच्या दिशेने ३ राउंड फायर केले. अचानक झालेल्या गोळीबाराच्या आवाजाने पाटील कुटुंब आणि शेजारी प्रचंड घाबरले. घटनेची माहिती मिळताच अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे, स्थानिक गुन्हे शाखेचे पोलीस निरीक्षक राहुल गायकवाड आणि एमआयडीसी पोलीस ठाण्याचे निरीक्षक बबन आव्हाड यांच्यासह मोठा पोलीस फौजफाटा घटनास्थळी दाखल झाला.
पोलिसांनी घटनास्थळावरून गोळीबाराच्या दोन रिकाम्या पुंगळ्या घराबाहेरून आणि एक घरातून जप्त केली आहे. फॉरेन्सिक पथकानेही पुरावे गोळा केले असून, हल्लेखोरांच्या शोधासाठी विविध पथके रवाना करण्यात आली आहेत.
