---Advertisement---
जळगाव : केंद्रीय क्रीडा राज्यमंत्री रक्षा खडसे यांच्या मालकीच्या रक्षा ऑटो फुएल्स या मुक्ताईनगरातील पेट्रोल पंपावर दरोडा टाकण्यात आला. यात दोन कर्मचाऱ्यांना बंदुकीचा धाक दाखवत मारहाण करीत तोडफोड करण्यात आली. जवळपास एक लाख रुपयांची रोकड लंपास करण्यात आली. ही थरारक घटना राष्ट्रीय महामार्गावर गुरुवारी रात्री १०:४५ वाजेच्या सुमारास घडली. दरम्यान, पोलिसांनी तीन संशयित दरोडेखोरांना ताब्यात घेतले आहे.
प्रकाश माळी व दीपक खोसे अशी मारहाण झालेल्या कर्मचाऱ्यांची नावे आहेत. या पेट्रोल पंपावर दोन दुचाकीवर आलेल्या पाच जणांनी अचानक या कर्मचाऱ्यांना मारहाण करण्यास सुरुवात केली. कर्मचाऱ्यांच्या डोक्याला बंदूक लावत गल्ल्यातील आणि कर्मचाऱ्यांकडे असलेली जवळपास एक लाख रुपयांची रोकड लंपास केली.
तसेच ऑफिसमधील संगणक, प्रिंटर, सीसीटीव्ही आणि विविध इलेक्ट्रॉनिक उपकरणांची तोडफोड करण्यात आली. दरम्यान, मागील आठ दिवसांत मुक्ताईनगरात चार ठिकाणी घरफोड्या झाल्या आहेत. यापैकी दोन घरफोड्या या दिवसा झाल्या आहेत. त्यामुळे नागरिकांमध्ये चिंता आणि भीतीचे वातावरण निर्माण झाले आहे.
रहदारीच्या मार्गावर दरोड्याची घटना
मुक्ताईनगरातील हा पेट्रोलपंप अत्यंत रहदारीच्या मार्गावर आहे. या ठिकाणी नेहमी वाहनांची रात्री उशिरापर्यंत वर्दळ असते. अशात अचानक दरोड्याची घटना घडल्याने नागरिकांमध्ये भितीचे वातावरण आहे.
दरोड्याची घटना घडल्यानंतर परिसरातील नागरिकांनी तत्काळ घटनास्थळी धाव घेतली, परंतु तोपर्यंत दरोडेखोर पसार झाले होते. पोलिसांना दरोड्याची माहिती मिळताच त्यांनी पोलिस पथके खाना केल्याची माहिती देण्यात आली.
