दुर्दैवी! चेतनला खायचे होते कांदेपोहे, पण नियतीच्या मनात काही औरच…, घटनेनं जळगावात हळहळ

जळगाव : शहरातून एक हृदयद्रावक समोर आली आहे. अर्थात चेतन या चार वर्षीय चिमुकल्याला कांदेपोहे खायचे होते. त्याने आईकडे याचा हट्ट केला, त्याच्या आईने पोहे तयार करण्यासाठी कांदे कापत असताना, चेतन खेळत खेळत अचानक बाथरुममध्ये गेला आणि दुर्दैवी घटना घडली. या घटनेमुळे वाटीका आश्रम परिसरात तसेच पाटील कुटुंबीयांवर शोककळा पसरली असून परिसरात हळहळ व्यक्त केली जात आहे.

चेतन जितेंद्र पाटील (वय ४, रा. वाटीका आश्रम, जळगाव) असे मयत मुलाचे नाव आहे. जळगावच्या वाटिका आश्रम परिसरात वास्तव्यास असलेले त्याचे वडील जितेंद्र पाटील हे एसटी वर्कशॉपला कामाला आहेत. आठ दिवसांपूर्वी चेतन घरी खेळत होता, त्याने त्याच्या आईकडे कांदेपोहे खाण्याचा हट्ट केला,

त्याची आई पोहे तयार करण्यासाठी कांदे कापत असताना, चेतन खेळत असताना अचानक बाथरुममध्ये गेला. तेथे बादलीत ठेवलेले गरम पाणी त्याच्या अंगावर पडले.

गरम पाण्यामुळे चेतन गंभीररित्या भाजला गेला होता. त्याला तातडीने शहरातील शासकीय वैद्यकीय महाविद्यालय व रुग्णालयात उपचारासाठी दाखल केले.

मात्र, भाजलेल्या जखमांमुळे त्याची प्रकृती गंभीर बनली आणि उपचारादरम्यान बुधवारी दुपारी ३ वाजता त्याची प्राणज्योत मालवली. या घटनेमुळे वाटीका आश्रम परिसरात तसेच पाटील कुटुंबीयांवर शोककळा पसरली असून परिसरात हळहळ व्यक्त केली जात आहे.