---Advertisement---
जळगाव : सर्वोच्च न्यायालयात झालेल्या सुनावणीच्या पार्श्वभूमीवर आरक्षणाची मर्यादा ओलांडलेल्या जिल्हा परिषद आणि पंचायत समित्यांच्या गट आणि गणांमध्ये निवडणूक आयोगाकडून आता आरक्षणाची फेररचना करण्यात येईल. या फेररचनेनुसार गट आणि गणांच्या आरक्षण रचनेत ५० टक्क्यांपर्यत पुन्हा मोठे बदल होण्याची शक्यता वर्तविली जात आहे. यात खान्देशातील धुळे आणि नंदुरबार जिल्हा परिषदांसह सर्वच पंचायत समित्या, तर जळगाव जिल्ह्यातील चार पंचायत समित्यांचा समावेश आहे.
स्थानिक स्वराज्य संस्थांमधील आरक्षणाची मर्यादा ५० टक्क्यांवर गेल्याने सर्वोच्च न्यायालयात याचिका दाखल होती. याचिकेसंदर्भात वेळोवेळी सुनावण्या होऊन निर्णय लांबणीवर पडत असल्याने सर्वच निवडणुकांवर टांगती तलवार होती. सर्वो च्च न्यायालयाच्या शुक्रवारी झालेल्या सुनावणीच्या पार्श्वभूमीवर नगरपरिषद व नगरपंचायतींना दिलासा मिळाला असून, त्या वेळेवर होणार आहेत. मात्र, ५० टक्के आरक्षणाची मर्यादा ओलांडलेल्या जिल्हा परिषद आणि पंचायत समित्यांमध्ये आरक्षणाबाबतची फेररचना निवडणूक आयोगाकडून करण्यात येईल. त्यानुसार आधी जाहीर केलेल्या रचनेत फेररचनेमुळे मोठे बदल होण्याची शक्यता आहे.
जळगावात चार, तर धुळे, नंदुरबारमध्ये सर्वच पंचायत समित्या!
खान्देशातील जळगाव, धुळे, आणि नंदुरबार तीन जिल्हा परिषदांचा समावेश आहे, तसेच जळगाव जिल्हा परिषदेंतर्गत चोपडा, यावल, रावेर, धरणगाव या चार पंचायत समित्यांचा समावेश आहे. धुळे जिल्ह्यात शिरपूर, शिंदखेडा, साक्री, धुळे, तर नंदुरबार जिल्ह्यात अक्कलकुवा, अक्राणी, तळोदा, शहादा, नंदुरबार, नवापूर या सर्वच पंचायत समित्यांचा समावेश आहे.
नाशिकमध्ये नऊ पंचायत समित्यांच्या गणांत फेरबदल
नाशिक जिल्ह्यात १५ पैकी ९ पंचायत समित्या गणांची फेररचना होईल. नाशिक जिल्ह्यात बागलाण, मालेगाव, कळवण, पेठ, दिंडोरी, नांदगाव, नाशिक, त्र्यंबक, इगतपुरी या ९ पंचायत समित्यांच्या गणांमधील आरक्षणात फेरबदल होणार आहे.
५० टक्के मर्यादेनुसार गट-गणांच्या आरक्षणानंतरच निवडणूक
आरक्षणाची ५० टक्क्यांची मर्यादा ओलांडलेल्या ठिकाणचे आरक्षण ५० टक्क्यांच्या मर्यादित आणून नंतरच राज्य निवडणूक आयोग राज्यातील सर्व जिल्हा परिषद व पंचायत समित्यांच्या निवडणुकीचा कार्यक्रम जाहीर होण्याची शक्यता आहे. यात जळगाव जिल्हा परिषद गटांमधील आरक्षणात तसेच चार पंचायत समित्यांतर्गत गणांच्या आरक्षणातही फेरबदल होणार असल्याचे संकेत आहेत.
