जळगाव जिल्ह्यात आणखी एकावर गोळीबार; फॉरेन्सिक पथकाकडून तपास सुरू

जळगाव : भुसावळ शहरातील जळगाव नाका परिसरात पान टपरी चालकावर गोळीबार झाल्याची घटना ताजी असतानाच, जिल्हयात पुन्हा जुन्या वादातून एकावर गोळीबार केल्याची घटना समोर आली आहे.

चाळीसगाव शहरातील रेल्वे स्टेशनला लागून असलेल्या परिसरात मध्यरात्री जुन्या वादातून एकावर गोळीबार केल्याची घटना घडली. रोहिदास कोळी असे जखमी तरुणाचे नाव असून त्याच्यावर चाळीसगाव ग्रामीण रुग्णालयात उपचार सुरू आहेत.

सलग दोन राउंड फायर झाल्याचा प्राथमिक अंदाज असून घटनेनंतर परिसरात एकच खळबळ उडाली. घटनेची माहिती मिळताच चाळीसगाव पोलीस तात्काळ घटनास्थळी दाखल झाले.

फॉरेन्सिक पथकाकडून घटनास्थळाची तपासणी सुरू असून पुरावे गोळा करण्यात येत आहेत. गोळीबार करणाऱ्या व्यक्तीचा शोध घेण्यासाठी परिसरातील सीसीटीव्ही फुटेज तपासण्याचे काम सुरू आहे. या प्रकरणी गुन्हा दाखल करण्याची प्रक्रिया सुरू असून पुढील तपास पोलीस करत आहेत.