---Advertisement---
धरणगाव तालुक्यातील संजय नगर परिसरात घरगुती वादातून एक गंभीर प्रकार घडला आहे. पत्नीच्या चारित्र्यावर संशय घेत पतीने तिच्यावर चाकूने हल्ला केल्याची घटना समोर आली आहे. या हल्ल्यात पत्नी गंभीर जखमी झाली असून तिच्यावर सध्या धरणगाव ग्रामीण रुग्णालयात उपचार सुरू आहेत.
मिळालेल्या माहितीनुसार, मरीआई मंदिराजवळील संजय नगर येथे दीपक बुधा लोंढे आणि त्यांची पत्नी सोनल दीपक लोंढे हे राहत होते. दोघांमध्ये काही काळापासून कौटुंबिक कारणांवरून वाद होत होते. ८ एप्रिल रोजी दुपारी सुमारे साडेबारा वाजण्याच्या सुमारास हा वाद चिघळला आणि त्याचे रूपांतर हाणामारीत झाले.
या दरम्यान दीपक लोंढे यांनी घरातील धारदार चाकूने पत्नीवर वार केले. स्वतःचा बचाव करण्याचा प्रयत्न करणाऱ्या सोनल यांचा प्रतिकार कमी करण्यासाठी त्यांनी तिच्या डोळ्यांत आणि तोंडावर मिरची पूड फेकली. त्यामुळे ती गंभीर जखमी झाली आणि डोळ्यांत तीव्र जळजळ होऊ लागल्याने तिने आरडाओरड केली.
घटनेची माहिती मिळताच सोनल यांच्या आई जिजाबाई पंडित पवार घटनास्थळी पोहोचल्या आणि त्यांनी पोलिसांना कळवले. धरणगाव पोलिसांनी तातडीने घटनास्थळी धाव घेत जखमी सोनल यांना ग्रामीण रुग्णालयात दाखल केले. तसेच आरोपी दीपक लोंढे याच्याविरुद्ध गुन्हा नोंदवून त्याला ताब्यात घेतले आहे.
या घटनेमुळे परिसरात काही काळ भीतीचे वातावरण निर्माण झाले होते. पोलिसांकडून पुढील तपास सुरू आहे.
