---Advertisement---
पुण्यश्लोक अहिल्यादेवी होळकर यांच्या त्रिशताब्दी जन्मोत्सवाचे औचित्य साधून महाराष्ट्र शासनाच्या जलसंपदा विभागामार्फत आयोजित ‘गोदा ते नर्मदा’ जलयात्रेचा भव्य शुभारंभ उपमुख्यमंत्री देवेंद्र फडणवीस यांच्या हस्ते श्री क्षेत्र त्र्यंबकेश्वर येथे पार पडला. आगामी सिंहस्थ कुंभमेळ्याच्या पार्श्वभूमीवर गोदावरी नदी पूर्णतः प्रदूषणमुक्त (निर्मळ) आणि प्रवाही (अविरल) राखण्यासाठी शासन विशेष प्रयत्न करणार असल्याची ग्वाही त्यांनी यावेळी दिली.
कार्यक्रमात बोलताना फडणवीस म्हणाले की, शासनाने नदी जोड प्रकल्पाच्या माध्यमातून महाराष्ट्र दुष्काळमुक्त करण्याचा महत्त्वपूर्ण निर्णय घेतला आहे. गोदावरी नदी केवळ महाराष्ट्रासाठीच नव्हे तर आंध्रप्रदेशासाठीही जीवनवाहिनी आहे. ही नदी बारामाही प्रवाहित राहावी, यासाठी विविध तांत्रिक आणि पर्यावरणीय उपाययोजना केल्या जात आहेत.
पुण्यश्लोक अहिल्यादेवी होळकर यांच्या कार्याचे स्मरण करताना ते म्हणाले, “अहिल्यादेवींनी अध्यात्म आणि उपयुक्तता यांचा मेळ घालत घाट व बारव (विहिरी) यांची निर्मिती केली. त्यांनी उभारलेले बारव आजही सुस्थितीत असून, राज्य शासन त्यांचे संवर्धन करेल.” वारसा संवर्धन आणि आधुनिक विकास यांचा समन्वय साधणे हेच देशाच्या उज्ज्वल भविष्यासाठी आवश्यक असल्याचेही त्यांनी नमूद केले.
या सोहळ्याला अन्न व नागरी पुरवठा मंत्री छगन भुजबळ, जलसंपदा मंत्री राधाकृष्ण विखे पाटील, गिरीश महाजन, इंदूर संस्थानचे श्रीमंत युवराज यशवंतराव होळकर, अण्णासाहेब मोरे, नाशिकच्या महापौर हिमगौरी आडके आणि दीपक कपूर आदी मान्यवर उपस्थित होते.
३० नदीखोऱ्यांतील पाणी नर्मदेला अर्पण
मंत्री विखे पाटील यांनी माहिती दिली की, ही जलयात्रा त्र्यंबकेश्वर आणि चोंडी येथून सुरू होऊन मध्य प्रदेशातील माहेश्वर येथे नर्मदातीरी समाप्त होईल. या यात्रेदरम्यान राज्यातील ३० वेगवेगळ्या नदीखोऱ्यांतील पाणी कलशांमध्ये भरून ते नर्मदेला अर्पण केले जाईल. यातून जलसंवर्धनाचा संदेश जनमानसात रुजविण्याचा शासनाचा मानस आहे.
असा असेल जलयात्रेचा मार्ग:
२५ एप्रिल: त्र्यंबकेश्वर ते संगमनेर (मुक्काम).
२६ एप्रिल: संगमनेर ते शिर्डी (मुक्काम).
२७ एप्रिल: कोपरगाव, वैजापूर, संभाजीनगर, घृष्णेश्वर (मुक्काम).
२८ एप्रिल: कन्नड, चाळीसगाव, धुळे (मुक्काम).
२९ एप्रिल: धुळे ते महेश्वर (मध्य प्रदेश) – समारोप.
या उपक्रमात नागरिकांनी मोठ्या संख्येने सहभागी व्हावे, असे आवाहन प्रशासनाकडून करण्यात आले आहे.
