---Advertisement---
वॉशिंग्टन, दि. २६ : अमेरिकेचे माजी राष्ट्राध्यक्ष डोनाल्ड ट्रम्प यांच्यावर पुन्हा एकदा जीवघेणा हल्ला करण्याचा प्रयत्न झाल्याने जगभरात खळबळ उडाली आहे. वॉशिंग्टन डीसी येथील हिल्टन हॉटेलमध्ये आयोजित ‘व्हाइट हाऊस कॉरस्पॉन्डेंट्स डिनर’ या हाय-प्रोफाइल कार्यक्रमादरम्यान हा गोळीबार झाला.
मिळालेल्या माहितीनुसार, ट्रम्प भाषण देत असताना अचानक गोळीबाराचा आवाज झाला. काही क्षणांतच सीक्रेट सर्व्हिसच्या एजंटांनी तत्परता दाखवत ट्रम्प यांच्याभोवती ‘ह्यूमन शिल्ड’ तयार केले आणि त्यांना सुरक्षित स्थळी हलवले. या घटनेमुळे सभागृहात एकच गोंधळ उडाला.
घटनास्थळी उपस्थित सुरक्षा रक्षकांनी तात्काळ कारवाई करत हल्लेखोराला जागीच ठार केले. प्राथमिक माहितीनुसार, हल्लेखोराचा निशाणा थेट ट्रम्प यांच्यावर होता. या जलद कारवाईमुळे मोठा अनर्थ टळल्याचे अधिकाऱ्यांनी सांगितले.
कार्यक्रमस्थळी अमेरिकेचे उपराष्ट्राध्यक्ष आणि इतर अनेक मान्यवर उपस्थित होते. गोळीबारानंतर काही काळ भीतीचे वातावरण निर्माण झाले असून अनेक पाहुण्यांनी स्वतःचा बचाव करण्यासाठी आसरा घेतला.
या घटनेनंतर अमेरिकेच्या सुरक्षा व्यवस्थेवर प्रश्नचिन्ह उपस्थित झाले आहे. इतक्या कडेकोट बंदोबस्तात हल्लेखोर आत कसा पोहोचला, याचा तपास सुरू करण्यात आला आहे. सध्या परिसरात अतिरिक्त सुरक्षा तैनात करण्यात आली असून सर्व मान्यवर सुरक्षित असल्याची माहिती देण्यात आली आहे.
